Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 58 Hüküm no: 22 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Kemaleddin’in Defterdâr Mustafa Paşa’nın hâssı almak için verdiği câizenin iâdesi Vilâyet-i Anadolu’da hâlâ muvakkaten Kilis kadısı olan umdetü kuzâti’l-İslâm zübdetü vülâti’l-enâm Mehmed Efendi b. el-merhûm Kemaleddin Efendi meclis-i şer‘-i lâzımü’t-tevkīrde, atebe-i aliyye-i sultâniyede bundan [akdem] şıkk-ı evvel defterdârı olup hâlâ maktûlen vefât eden Mustafa Paşa’nın kethüdâsı olan fahrü’l-akrân Mehmed Ağa b. ( ) mahzarında üzerine da‘vâ edip, bundan akdem mezbûr Mehmed Ağa’nın kendiye maktûl-i mezbûr Mustafa Paşa’dan vilâyet-i Anadolu’da Konya eyâletinde Suğla hâssı[nı] alıvermek için câ’ize nâmına kırk bin nakd-i râyic fi’l-vakt akçe def‘ ve teslîm eylemiş idim. Hâlâ meblağ-ı merkūm kırk bin akçeyi mezkûr Mehmed Ağa’dan taleb ederim dedikde, gıbbe’s-suâl merkūm Mehmed Ağa cevâbında, fi’l-hakīka müdde‘î-i müşârunileyh Mehmed Efendi yedinden zikr olunan hâssı alıvermek için câize nâmına kırk bin mezbûru’n-na‘t akçe almış idim deyü i‘tirâf etmeğin, mezbûr Mehmed Ağa meblağ-ı mezbûru müdde‘î-i müşârunileyh Mehmed Efendi’ye red ve teslîm etmek için merkūm Mehmed Ağa’ya tenbîh olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Zilhicceti’ş-şerîfe fi’t-târihi’l-mezbûr. Şuhûdü’l-hâl: Fahrü’l-akrân Ağa Veli Ağa, Zahrü’l-emsâl Yusuf Ağa muhzırbaşı, Musli b. Musa, İskender b. Şaban el-muhzır ve gayruhüm mine’l-huzzâr.