Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 64 Hüküm no: 26 Orijinal metin no: [7b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Yusuf’un ödünçten dolayı Aydın Paşa’nın terekesinde alacağı olduğu Udûlden, Dâru’l-hilâfeti’l-aliyye mahmiye-i Kostantıniyye mahallâtından Madran? mahallesinde sâkin olan Perviz Bey b. Abdullah ve Hızır Bey mahallesinde sâkin olan İsmail Beşe b. Abdullah nâm kimesneler meclis-i şer‘-i şerîf ve mahfil-i dîn-i münîfde hâzırân olup, bundan akdem vefât eden merhûm Aydın Paşa’nın Receb, Fâtıma ve Ayşe nâm evlâd-ı sıgārına tesviye-i umûrları için hâkim-i men lehû velâyetü’n-nasb kıbelinden vasîyy-i mansûb olan ve vesâyet-i mahkiyyesi hasebiyle müteveffâ-i mezbûrun terekesine vâzı‘-ı yed bulunan, husûs-ı âtiyyü’z-zikri münkir umdetü’l-müderrisîn İbrahim Efendi b. Ebûbekir mahzarında râcilin zümresinden olup üçüncü râcilin bölüğünden hâmil-i hâze’l-kitâb Ahmed Beşe b. Yusuf’dan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, lehine şâhidlik yapılan müdde‘î-i mezbûrun, müteveffâ-i merkūmun zimmetinde karz-ı şer‘î cihetinden dört yüz riyâl sikke-i harbiyye-i fıddiyye hakkı vardır. Müsteşhed-i mezbûr ona ikrâz etmiş o da hâl-i hayâtında bizim yanımızda meblağ-ı merkūmu istikrâz etmişdi. Elân müdde‘î-i mezbûrun, meblağ-ı merkūmu tereke-i vâfiyeden taleb etmeye hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın ba‘de’t-tahlîfi’ş-şer‘î mûcibince hükmedildi. Cerâ zâlike ve hurrire fî evâsıtı Zilhicce eş-şerîfe fi’t-târihi’l-mezbûr. Şuhûdü’l-hâl: Fahrü’l-akrân Yusuf Ağa b. Reisü’l-muhzırîn, el-Hâc Abbas b. İbrahim, İskender b. Şaban, İbrahim Beşe b. Şükrullah, el-Hâc Mustafa b. el-Hâc Mehmed, el-Hâc Mehmed b. el-Hâc Hüseyin, el-Hâc İsmail b. Hamza, el-Hâc Ali b. Murad