Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 65 Hüküm no: 27 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in el-Hâc Mustafa b. Ali’deki alacağının bir kısmını aldığı Mahmiye-i İstanbul’da ( ) mahallesinde sâkin Mehmed b. Mehmed nâm kimesne meclis-i şer‘-i hatîr-i lâzımü’t-tevkīrde, işbu hâmilü’l-kitâb el-Hâc Mustafa b. Ali nâm kimesne mahzarında ikrâr ve takrîr-i kelâm edip, bundan akdem mezbûr el-Hâc Mustafa benden bi gayri vech-i şer‘î kırk altı bin nakd-i râyic fi’l-vakt akçemi [aldın] deyü da‘vâ ve taleb eyledikde, ol dahi inkâr edip ben dahi isbâtdan âciz olup yemîn teklîf eyledikde, fedâ-i yemîn bana iki bin nakd-i râyic fi’l-vakt akçe verip, ben dahi meblağ-ı mezbûr iki bin akçemi merkūm el-Hâc Mustafa’nın yedinden alıp kabz edip, hakk-ı tahlîfimi iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Fahrü’l-akrân Yusuf Ağa reisü’l-muhzırîn, el-Hâc Yahya b. Zekeriya el-muhzır, Süleyman b. Zekeriya el-muhzır, el-Hâc Behrâm b. ( ), İskender b. Şaban.