Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 66 Hüküm no: 29 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol Reis’in gemisinde bazı malları telef olan Nakşalı zimmîlerin birbirleriyle anlaştıkları Akdeniz’de vâki‘ Nakşa adasında sâkin olan zimmî tâifesinden işbu hâmilü’l-kitâb Kostantin v. Lefter ve Yani v. Lefter ve Arkurus v. Manol ve Pandilos v. Yorgi ve Yani [v.] Yanaki nâm zimmîler meclis-i şer‘a gelip bi tav‘ihim ikrâr ve takrîr-i kelâm edip, bundan akdem zikr olunan ada zimmîlerinden Manol Reis’in gemisine kız dimisi demekle ma‘rûf olan metâ‘ımı tahmîl edip, bu tarafa gelirken deryâda harbî kâfir gemisine rast gelip bizim metâ‘ımızı aldıklarında biz dahi zikr olunan gemide olan yolcularından olup metâ‘ı alınmayanlar ile nizâ‘ eylediğimizde cümlemizin metâ‘ı hesâb olunup, metâ‘ı zâyi‘ olmayanlar beyninde alâ tarîki’l-guremâ tevzî‘ olunmak için savb-ı şer‘den Mustafa Efendi nâm nâib irsâl olunmakla, cümlenin rızâsıyla metâ‘ı tahrîr ve defter olundukdan sonra mezbûr Kostantin Mişel v. Varvad yedinden beş yüz endâze ve Matos v. Matyoz yedinden yüz endâze cem‘an altı yüz endâze kız dimisi alıp kabz edip ve mezbûr Yani v. Lefter dahi Nikola v. Arvad nâm zimmî yedinden dört yüz zirâ‘ ada dimisi alıp ve mesfûr Argiri dahi Manol v. Dimitri nâm zimmî yedinden altı yüz zirâ‘ ada dimisi alıp ve mesfûr Pandilos dahi ( ) v. Matyoz nâm zimmî yedinden üç yüz zirâ‘ ada dimisi alıp ve mezbûr Yani zimmî Manol v. Dimitri yedinden yüz elli endâze ve Yani v. Kortlak’dan doksan endâze cem‘an iki yüz kırk endâze kız dimisi ve Nikola v. Hanti yedinden dahi yüz endâze ada dimisi alıp ve Yorgi v. Matyoz yedinden altı zirâ‘ kız dimisi bâkī kalmışdır. Ba‘de’l-yevm her birimizin âhar ile da‘vâ ve nizâ‘ı yokdur, yedimizde olan defter mûcebince takrîr hüccet olunup yedimize verilsin deyü mezbûr Mustafa Efendi’nin hattını müştemil ve takrîr-i meşrûhlarına mutâbık defter îrâd eylediklerinde, sûret-i hâl hıfz-ı makāl için bi’t-taleb ketb olundu. Tahrîren fî evâ’ili Zilka‘deti’l-harâm li sene isneteyn ve erba‘în ve elf. Şuhûdü’l-hâl: Pîrî Çavuş el-Mübâşir, Piyâle Bey b. Abdullah, Dilaver Bey b. Abdullah, Mustafa Çelebi b. Abdi, Bâli Çelebi b. Abdullah, Hasan Bey b. Mustafa ve gayruhüm mine’l-huzzâr.