Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 67 Hüküm no: 31 Orijinal metin no: [8a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İdam edilen Yusuf Paşa’nın Şam beylerbeyiliğinde el koyduğu Hisar Ağası Ömer Ağa b. Haydar’ın mallarının iâdesi Medîne-i Şâm-ı şerîf-i şeref-encâmda olan Hisâr ağası olan bâ‘isü’l-kitâb fahrü’l-a‘yân Ömer Ağa b. Haydar nâm kimesnenin halîlesi ve tarafından vech-i âtî üzre da‘vâ ve isbâta ve ityân-ı beyyinâta vekîl olup, vekâleti nehc-i mu‘teber üzre Mehmed b. Nurullah ve Mehmed Beşe b. Ahmed nâm kimesneler şehâdetleri ile sâbite olan fahrü’l-muhadderât Fâtıma bt. Ali Ağa nâm hâtun meclis-i şer‘de, bundan akdem Şâm-ı şerîf Beylerbeyiliğinden münfasıl iken maktûlen müteveffâ olup, zâhirde vâris-i ma‘rûfu olmamakla terekesi taraf-ı mîrîye âid olan Yusuf Paşa’nın muhallefâtına vâzı‘u’l-yed olup, atabe-i aliyyede bi’l-fi‘il şıkk-ı sânî defterdârı olan kıdvetü’l-emâcid ve’l-ekârim hâvi’l-mehâmid ve’l-mekârim Ömer Efendi tarafından vech-i âtî üzre inkâr ve husûmete vekîl olup, vekâleti bimâ hüve tarîkü’s-sübût sâbite olan Maksud Bey nâm kimesne mahzarında bi’l-vekâle takrîr-i da‘vâ edip, müteveffâ-yı merkūm Yusuf Paşa bundan akdem hâl-i hayâtında Şâm-ı şerîf Beylerbeyisi iken zevcim müvekkil-i mezbûr Ömer Efendi’den gasben ve cebren iki bin aded esedî guruş alıp kabz eyledikden mâ‘adâ merkūm Ömer Efendi’nin Şâm-ı şerîf muzâfâtından merhûm Sultan Selim Hân Vakfı’ndan Evra nâm karyede vâki‘ ma‘lûmü’l-hudûd çiftliğini basıp, dâhilinde vâki‘ olup müvekkilimin silk-i mülkünde olan yüz bin akçe kıymetli hınta ve şa‘îr ve devâb ve sâyir esbâb ve esvâbını dahi zulmen ve cebren alıp kabz eylemiş idi. Elân vekâlet-i mahkiyyem hasebiyle muhallefâtından taleb ederim dedikde, gıbbe’s-suâl mezbûr Maksud Bey husûs-ı mezbûru bi’l-vekâle inkâr edip, müdde‘iyye-i mûmâ-ileyhâdan müdde‘âsına mutâbıka beyyine taleb olundukda, udûl-i müslimînden mahmiye-i merkūmede Saray-ı atîk kurbunda sâkin olan Mehmed Efendi b. Nurullah ve zikr olunan Saray-ı atîk baltacılarından el-Hâc Mehmed Beşe b. Musa nâm kimesneler li ecli’ş-şehâde hâzırân olup akībe’l-istişhâd, fi’l-vâki‘ müteveffâ-yı merkūm Yusuf Paşa bundan akdem hâl-i hayâtında Şâm-ı şerîf Beylerbeyisi iken müvekkil-i mûmâ-ileyh Ömer Efendi’den gasben ve cebren bin aded esedî guruş alıp kabz eylediğinden mâ‘adâ merkūm Ömer Efendi’nin Şâm-ı şerîf muzâfâtından merhûm Sultan Selim Hân Vakfı’ndan Evra nâm karyede vâki‘ ma‘lûmü’l-hudûd çiftliği basıp, dâhilinde [8b] mülkünde olan yüz bin akçe kıymetli hınta ve şa‘îr ve devâb ve sâyir esbâb ve esvâbını dahi zulmen ve cebren alıp kabz eyledi idi. Bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, ba‘de ri‘âyet-i şerâiti’l-kabûl şehâdetleri makbûle olup mûcebiyle edâsına tenbîh olunup, mâ vaka‘a bi’t-taleb ketb olundu. Tahrîren fî evâhiri Zilhicceti’ş-şerîfe min şuhûri li sene isneteyn ve erba‘în ve elf. Şuhûdü’l-hâl: Mehmed Beşe b. Yunus, Yusuf b. Abdullah, Hüseyin b. Ahmed, Dilaver Çavuş b. Abdullah, el-Hâc Mustafa b. Hüseyin ve gayruhüm.