Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 68 Hüküm no: 32 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ali’nin defterli kıbtiyân vergilerini toplayan Mehmed Çavuş b. Ali’de alacağının kalmadığı Vilâyet-i Rumeli’nde vâki‘ kasaba-i Kırkkilise ahâlîsinden olup, mahmiye-i Galata tevâbi‘inden Beşiktaş kasabasında sâkin olan Mehmed Bey b. Ali el-Cündî meclis-i şer‘-i hatîrde, dergâh-ı âlî -dâme mahfûfen bi’l-me‘âlî- çavuşlarından olup, bundan akdem vilâyet-i mersûme mukāta‘âtından Yanbolu kalemine tâbi‘ defterli kıbtiyân ta’ifesinin bin kırk senesine mahsûb olmak üzre cizye ve ispençelerini cem‘e me’mûr olan bâ‘isü’l-kitâb fahrü’l-a‘yân Mehmed Çavuş b. Ali nâm kimesne mahzarında bi tav‘ihî ikrâr ve takrîr-i kelâm edip, bundan akdem mezbûr Mehmed Çavuş ile mukāta‘a-i merkūme mahsûlüne müte‘allik ba‘zı hesâbımız olup, mezbûr Mehmed Çavuş’un hizmetkârı olan Yunus Bey nâm kimesne ile kendilerine irsâl eylediğim yüz bin akçe için bana vâsıl olmadı demekle beynimizde münâza‘ât-ı kesîre vâki‘ olmuşidi. El-hâletü hâzihî erbâbü’l-bâb huzûrunda hesâb ve kitâb eylediğimizde mezbûr Mehmed Çavuş zimmetinde zuhûr eden hakkı kalîl ü kesîri ne mikdâr var ise bi’t-tamâm ve’l-kemâl mezbûr Mehmed Çavuş’un yedinden alıp kabz eyledim. Min ba‘d mezbûr Mehmed Çavuş ile mukāta‘a-i merkūme mahsûlüne müte‘allik alâkam kalmadı dedikde mukırr-ı merkūm Mehmed Bey’i kelimât-ı meşrûhasında mezbûr Mehmed Çavuş dahi bi’l-muvâcehe tasdîk ve sûret bu minvâl üzre idiğini tahkīk edicek, mâ vaka‘a bi’t-taleb ketb [olundu]. Tahrîren fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Mehmed Çavuş bölükbaşı, Kara Ahmed Bey bölükbaşı, Mahmud Çavuş el-Üsküdârî el-Mübâşir, Ali Ağa kıbtiyân-ı sâbıkan, es-Seyyid İbrahim el-Hatîb, Mehmed Çavuş b. Abdullah, Mehmed Bey el-Cündî.