Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 69 Hüküm no: 33 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. el-Hâc Hüseyin’in Mehmed Efendi b. Sunullah’dan parasını alıp kiraladığı evi teslim etmesi Vilâyet-i Rumeli’nde sâbıkan Eğribucak kadısı olan işbu râfi‘ü’l-kitâb umdetü’l-kuzât es-Seyyid Mehmed Efendi b. Sunullah kendi tarafından asâleten ve li-ebeveyn kardeşi Seyyid Ahmed tarafından husûs-ı âti’l-beyâna vekîl olup nehc-i mu‘tebere üzre vekâleti sâbite oldukdan sonra vekâleten mahfil-i kazâda, mahmiye-i İstanbul’da Sultân mahallesinde sâkin Osman b. el-Hâc Hüseyin muvâcehesinde takrîr-i kelâm ve ta‘bîr-i ani’l-merâm edip, mahalle-i mersûmede vâki‘ bir tarafı Hasan Çelebi b. Abdullah mülkü ve bir tarafı Hüseyin Beşe b. Abdullah mülkü ve bir tarafı Çiçekçi Ömer Çavuş mülkü ve [bir] tarafı tarîk-i âm ile mahdûd fevkānî ve tahtânî iki bâb odaları ve sofayı ve bi’r-i mâyı ve dut ağacını hâvî muhavvatayı müştemil meşrûtamız olan vakıf menzili on sene mukaddem merkūm Osman’a îcâr ve teslîm edip, ol dahi istîcâr ve kabûl eyledikden sonra ber vech-i peşîn yedinden on bin akçe ahz u kabz eylemiş idik. Hâlâ meblağ-ı mezbûr on bin akçeyi mersûm Osman’a asâletim ve vekâletim hasebiyle edâ ve teslîm eyledim, suâl olunup mârrü’z-zikr menzili bana teslîme tenbîh olunmak matlûbumdur dedikde, gıbbe’s-suâl mersûm Osman cevâbında, fi’l-vâki‘ sâlifü’l-beyân on bin akçemi mûmâ-ileyh es-Seyyid Mehmed Efendi yedinden bi’t-tamâm ahz u kabz eyledim. Menzil-i mersûmu mûmâ-ileyhe teslîm edeyim deyicek i‘tirâfı üzre menzil-i mersûmu, mersûm es-Seyyid Mehmed Efendi’ye teslîme tenbîh birle, mâ hüve’l-vâki‘ bi’t-taleb [ketb] olundu. Fi’l-yevmi’s-sâlis aşer min Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Ahmed Efendi el-kadı, Mustafa Efendi el-kadı, Yunus b. ( ) ve gayruhüm.