Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 71 Hüküm no: 35 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Abdülmennân’ın Ahmed Beşe b. Sefer ile alacağı hususunda sulh olduğu Ebnâ-i sipâhiyândan Mahmud Bey b. Abdülmennân nâm cündî meclis-i şer‘-i hatîr-i lâzımü’t-tevkīrde, dergâh-ı âlî -dâme mahfûfen bi’l-me‘âlî- yeniçerilerinin seksen ikinci cemâ‘atinden işbu hâmilü’l-kitâb Ahmed Beşe b. Sefer nâm râcil mahzarında bi’t-tav‘i’s-sâf ikrâr ve i‘tirâf edip, bundan akdem mezbûr Ahmed Beşe’ye beynimizde ma‘lûme bir maslahat temşiyyeti için bi tarîki’r-rüşve yüz elli riyâlî guruş def‘ ve teslîm edip, ol dahi alıp kabz eyledikde, meblağ-ı mezbûru merkūm Ahmed Beşe’den da‘vâ ve taleb eyledikde inkâr edip, ben dahi isbât etmek sadedinde iken beynimizde muslihûn tavassut edip da‘vâ-yı mezkûreden beni merkūm Ahmed Beşe ile yetmiş kıt‘a riyâlî guruş üzerine sulh ettiklerinde, ben dahi “es-sulhu seyyidü’l-ahkâm” fehvâsı üzre sulh ve merkūmu kabûl ve bedel-i sulh olan meblağ-ı mezbûr yetmiş riyâlî guruşu merkūm Ahmed Beşe yedinden alıp kabz edip zimmetini da‘vâ-yı mezkûreden ibrâ-i âm ile ibrâ ve iskāt eyledim. Ba‘de’l-yevm eğer bi’z-zât veya vekîlden bi’l-vâsıta husûs-ı mezkûra müte‘allika da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde, mukırr-ı mezbûr Mehmed Bey’in minvâl-i muharrer üzre cârî ve sâdır olan ikrârını el-mukarru lehü’l-merkūm Ahmed Beşe vicâhen ve şifâhen tasdîk edicek, mâ hüve’l-vâki‘ bi’t-taleb ketb olundu. Tahrîren fi’s-sâlis ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Fahrü’l-emâcid Süleyman Beşe b. İbrahim Efendi, Hüseyin Çavuş, Hüseyin Çelebi el-bevvâb, Hüseyin Beşe b. Mahmud, İskender Bey b. Şaban.