Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 77 Hüküm no: 44 Orijinal metin no: [10a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den intikal eden odanın Rıdvan Çavuş’a satıldığı Mahmiye-i İstanbul’da Mehmed Paşa zâviyesinin şeyhi iken bundan esbak vefât eden merhûm Abdülkerim Efendi b. İbrahim’in verâseti, zevce-i metrûkesi Hümâ bt. Ahmed’e ve Aişe bt. Mustafa’ya ve sulbî kebîr oğulları Pîr Mehmed Çelebi ve Abdülkerim Çelebi’ye ve sulbiye kebîre kızları Râbia ve Emetullah nâm hâtunlara ve sulbiye sagīre kızı Sâbiha’ya münhasıra olup, mezbûr Pîr Mehmed Çelebi sagīre-i mersûmenin tesviye-i umûru için cânib-i şer‘-i mutahhardan mansûb vasîsi olup, hâkim-i muvakki‘-i kitâb huzûrunda sâbit ve mütehakkık oldukdan sonra mezbûr Pîr Mehmed Çelebi kendi tarafından asâleten ve sagīre-i mesfûre tarafından vesâyeten ve vâlidesi merkūme Aişe Hâtun ile hemşîresi Emetullah Hâtun taraflarından zikri âtî olan ebniyeyi bey‘a vekîl olup, mezbûretânı ma‘rifet-i şer‘iyye ile ârifân olan Ömer Efendi b. Mustafa ve Eyüb Çelebi b. Durak şehâdetleri ile hasm-ı şer‘î-i câhid mahzarında vekâleti sâbite oldukdan sonra vekâleten merkūm Abdülkerim Çelebi dahi kezâlik kendi tarafından asâleten ve vâlidesi mezbûre Hümâ Hâtun ile hemşîresi mesfûre Râbia Hâtun taraflarından kezâlik zikr-i âtî olan ebniyeyi bey‘a vekîl olup, şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu hâmilü’l-kitâb Rıdvan Çavuş b. ( ) mahzarında her biri asâleten ve vekâleten ve vesâyeten ikrâr ve takrîr-i kelâm edip, mûrisimiz müteveffâ-yı mezbûr hâl-i hayâtında ve kemâl-i sıhhatinde mahmiye-i mezbûrede Helvacıbaşı mahallesinde vâki‘ senede merkūm Behrâm Paşa evkāfına yedi yüz yirmi beş akçe mukāta‘a ile tasarrufunda olan arsa-i hâliye üzerine binâsı mülkü olmak üzre izn-i mütevellî ile beş bâb müte’ehhilîn odaları binâ edip, ba‘de vefâtihî bi hasebi’l-irsi’ş-şer‘î bize intikāl eylemişdi. Lâkin babamız müteveffâ-yı mezbûrun düyûn-ı müsbetesi olup, zarûret-i deyni için sâlifü’z-zikr beş bâb odalardan bir tarafı Mehmed Kethüdâ b. Yahya mülküne ve bir tarafı [10b] Masraf kâtibi Ali Efendi b. ( ) mülküne ve bir tarafı Emine Hâtun bt. Yusuf ve Hatice Hâtun bt. Yusuf mülklerine ve bir tarafı tarîk-i hâs ile müntehî olan bir bâb fevkānî ve bir bâb tahtânî odaları ve bir bâb sofayı ve kenîfi ve muhavvata-i yesîreyi müştemil arsasının senede vakf-ı mezbûra yüz beş akçe mukāta‘ası olup, binâsı mülkümüz olan bir bâb odayı mezbûr Rıdvan Çavuş tarafından îcâb ve kabûlü hâvî bey‘-i bât-ı sahîh-i şer‘î ile on üç bin beş yüz nakd-i râyic fi’l-vakt akçeye bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûr on üç bin beş yüz akçeyi mezbûr Rıdvan Çavuş yedinden bi’t-tamâm ve’l-kemâl ahz u kabz edip, ba‘de’l-yevm mârrü’z-zikr odanın binâsı keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın asâleten ve vekâleten ve vesâyeten cârî ve sâdır olan ikrârların merkūm Rıdvan Çavuş vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ömer Efendi b. Mustafa, Mustafa Efendi b. Mehmed el-Hatîb, Mehmed Efendi b. Memi el-Müderris, Ahmed Efendi b. Vildan el-Müderris, Sinan b. Mustafa, Eyüb b. Durak, Cafer b. Ali, Ali b. Hüseyin, Ebûbekir b. Kaya, Hüseyin b. Yahya, es-Seyyid Mustafa b. es-Seyyid Ahmed.