Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 78 Hüküm no: 45 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den intikal eden odanın Zeliha bt. Abdullah’a satıldığı Mahmiye-i İstanbul’da Mehmed Paşa zâviyesinin şeyhi iken bundan esbak vefât eden merhûm Abdülkerim Efendi b. İbrahim’in verâseti, zevce-i metrûkeleri Hümâ bt. Ahmed’e ve Aişe bt. Mustafa nâm hâtuna ve sulbî kebîr oğulları Pîr Mehmed Çelebi ve Abdülkerim Çelebi’ye ve sulbiye kebîre kızları Râbia ve Emetullah nâm hâtunlara ve sulbiye sagīre kızı Sâbiha’ya münhasıra olup, mezbûr Pîr Mehmed Çelebi sagīre-i mersûmenin tesviye-i umûru için cânib-i şer‘-i mutahhardan mansûb vasîsi olduğu hâkim-i muvakki‘ü’l-kitâb huzûrunda sâbit ve mütehakkık oldukdan sonra mezbûr Pîr Mehmed Çelebi kendi nefsinden asâleten ve sagīre-i mersûme tarafından vesâyeten ve vâlidesi merkūme Aişe Hâtun ile hemşîresi Emetullah Hâtun taraflarından zikr-i âtî olan ebniyeyi bey‘a vekîl olup, mezbûretânı ma‘rifet-i şer‘iyye ârifân olan Ömer Efendi b. Mustafa ve Eyüb Çelebi b. Durak şehâdetleri ile hasm-ı câhid-i şer‘î mahzarında vekâleti sâbite oldukdan sonra vekâleten merkūm Abdülkerim Çelebi dahi kezâlik kendi tarafından asâleten ve vâlidesi mezbûre Hümâ Hâtun ile hemşîresi mesfûre Râbia Hâtun taraflarından kezâlik zikr-i âtî olan ebniyeyi bey‘a vekîl olup, şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu sâhibetü’l-kitâb Zeliha bt. Abdullah nâm hâtun mahzarında her biri asâleten ve vekâleten ve vesâyeten ikrâr ve takrîr-i kelâm edip, mûrisimiz müteveffâ-yı mersûm hâl-i hayâtında ve kemâl-i sıhhatinde mahmiye-i mezbûrede Helvacıbaşı mahallesinde vâki‘ senede merkūm Behrâm Paşa evkāfına yedi yüz yirmi beş akçe mukāta‘a ile tasarrufunda olan arsa-i hâliye üzerine binâsı mülkü olmak üzre izn-i mütevellî ile beş bâb müte’ehhilîn odaları binâ edip, ba‘de vefâtihî bi hasebi’l-irsi’ş-şer‘î bize intikāl eylemişdi. Lâkin babamız müteveffâ-yı mersûmun düyûn-ı müsbetesi zarûret-i deyni için sâlifü’z-zikr beş bâb odalardan bir tarafı Mehmed Çavuş b. Yahya mülkü ve bir tarafı Fâtıma bt. ( ) mülkü ve iki tarafı tarîk-i hâs ile mahdûd bir bâb fevkānî ve bir bâb tahtânî ve sofayı ve kenîfi müştemil arsasının senede vakf-ı mezbûra yüz yirmi akçe mukāta‘ası olup, binâsı mülkümüz olan bir bâb odayı merkūme Zeliha Hâtun’a tarafeynden îcâb ve kabûlü hâvî bey‘-i bât-ı sahîh-i şer‘î ile yirmi iki bin beş yüz nakd-i râyic fi’l-vakt akçe bey‘ ve teslîm edip, ol dahi iştirâ ve tesellüm eyledikden sonra semeni olan meblağ-ı sâlifü’l-beyân yirmi iki bin beş yüz akçeyi mezbûre Zeliha Hâtun yedinden bi’t-tamâm ve’l-kemâl ahz u kabz edip, ba‘de’l-yevm mârrü’z-zikr odanın binâsı mersûme Zeliha’nın mülk-i müşterâsıdır. Keyfe mâ teşâ ve tahtâr mutasarrıfe olsun dediklerinde, mukırrân-ı mersûmânın asâleten ve vekâleten ve vesâyeten cârî olan ikrârların merkūme Zeliha Hâtun vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l yevmi’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ömer Efendi b. Mustafa, Mustafa Efendi b. Ahmed, Mehmed Efendi b. Memi el-Müderris, Ahmed Efendi b. Vildan el-Müderris, Eyüb Çelebi, Hızır b. Ali, Ali b. Hüseyin, Ebûbekir b. Memi, Hüseyin b. Yahya, es-Seyyid Mustafa [b.] es-Seyyid Ahmed, Ali b. Mehmed [Ahmed], Sinan b. Mustafa.