Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 80 Hüküm no: 46 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Çelebi b. İsa’nın Hüseyin Efendi b. İsa’ya olan borcunu kabul ettiği Mahmiye-i İstanbul’da merkūm ve mağfûrun leh Şeyh Ebülvefâ mahallesi sâkinlerinden İsmail Çelebi b. İsâ meclis-i şer‘-i hatîr-i lâzımü’t-tevkīrde, işbu hâmilü’l-kitâb Hüseyin Efendi b. İsâ mahzarında bi’t-tav‘i’s-sâf ikrâr ve i‘tirâf edip, mezbûr Hüseyin Efendi’ye zimmetimde cihet-i karz-ı şer‘îden beş bin nakd-i râyic fi’l-vakt akçe târih-i kitâbdan yüz seksen gün tamâmına değin müeccel ve mev‘ûd zimmetimde zirâ‘ı ma‘lûm iplik alacası bahâsından dahi bin akçe cem‘an mezbûr Hüseyin Efendi’ye zimmetimde altı bin nakd-i râyic fi’l-vakt akçe lâzımü’l-edâ ve vâcibü’l-kazâ deynim vardır dedikde, mukırr-ı mezbûr İsmail Çelebi’nin minvâl-i meşrûh üzre cârî olan ikrârını el-mukarru lehü’l-merkūm Hüseyin Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l yevmi’s-sâdis ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mehmed Efendi b. Mustafa es-Sahhâf, el-Hâc Abbas b. İbrahim, Yusuf Bey b. Şaban el-muhzır, İskender Bey b. Şaban el-muhzır.