Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 80 Hüküm no: 47 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Paşa Vakfı’nın Rumeli’deki mukâtaasının Ali Bey b. Abdullah ve Derviş Bey b. Abdullah’a verildiği Medîne-i Üsküdar muzâfâtından Gekvize kasabasında medfûn olan merhûm Mustafa Paşa Vakfı’nın elân mütevellîsi olup, mahmiye-i Kostantıniyye’de Haydarhâne mahallesinde sâkin olan Kasım Ağa b. Osman nâm kimesne meclis-i şer‘-i hatîrde, bi’l-fi‘il rikâb-ı hümâyûn-ı sa‘âdet-makrûn silâhdârlarından umdetü’l-emâcid ve’l-a‘yân Ahmed Ağa mensûbâtından olup, sipâh-ı zafer-penâh tâyifesinden olan işbu bâ‘isiyyü’l-kitâb Ali Bey b. Abdullah ve Derviş Bey b. Abdullah nâm kimesneler mahzarlarında bi tav‘ihî ikrâr ve takrîr-i kelâm edip, vakf-ı merkūmdan vilâyet-i Rumeli’nde Dukakin? sancağında vâki‘ Dadurga? mukāta‘asının bir senesi taraf-ı vakfdan maktû‘an verilmek lâzım olup mu‘tâd üzre tâlibîn beyninde müzâyede olundukda, merkūmân Ali Bey ve Derviş Bey üzerlerinde yüz doksan beş akçede karâr edip âhar tâlibi olmamakla, mukāta‘a-i merkūmenin bin kırk iki senesi Mart’ı ibtidâsından bin kırk üç senesi Mart’ına değin bir senesi mezbûrân Ali Bey ve Derviş Bey’e tevliyet-i mahkiyyem hasebiyle yüz doksan beş bin akçeye der-uhde eylediğimde, mezbûrân dahi ber vech-i iştirâk iltizâm ve kabûl eylediklerinden sonra zikr olunan yüz doksan beş bin akçenin doksan beş bin akçesini ber vech-i peşîn yedlerinden alıp, vakıf için kabz edip tasarruflarına izin ve yedlerine hat ve hâtemi müştemil temessük verdim. Ba‘de’l-yevm zimmetlerinde olan yüz bin akçeyi cânib-i tedrîcle teslîm eylesinler dedikde, mütevellî-i merkūm Kasım Ağa’yı kelimât-ı meşrûhasında merkūmân Ali Bey ve Derviş Bey dahi bi’l-muvâcehe tasdîk ve minvâl-i muharrer üzre mukāta‘a-i merkūmeyi bi’l-iştirâk kabûl ve meblağ-ı merkūmun vech-i muharrer üzre doksan beş bin akçesini teslîm eylediklerini tahkīk edicek, mâ vaka‘a bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ramazan Çelebi b. Sadi el-Kâtib, Mustafa Efendi b. Mehmed el-Kâtib, Mehmed b. Murad, Mahmud b. Ahmed el-Câbî, Mehmed b. Muzaffer el-Câbî, Mustafa Efendi el-Hatîb, Mehmed Dede b. Abdülkerim.