Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 81 Hüküm no: 49 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâşimî Hasan Efendi Vakfı’ndan ödünç alan kiracısı Osman Bey b. Derviş’in vakfa borcunu ödediği Mahmiye-i Kostantıniyye’de vâki‘ merhûm Hâşimî Hasan Efendi vakfının bi’l-fi‘il mütevellîsi olan Hasan b. Ali nâm kimesne meclis-i şer‘de, mahmiye-i merkūmede Mimar Ayas mahallesi sükkânından bâ‘isü’l-kitâb Osman Bey b. Derviş er-Râcil mahzarında bi tav‘ihî ikrâr ve takrîr-i kelâm edip, merkūm Osman Bey bundan akdem sene selâse ve selâsin ve elfde züyûf akçe ile altın üç yüz altmışar akçeye râyic iken mahalle-i merkūmede vâki‘ ma‘lûmü’l-hudûd mülk menzili bi tarîki’l-istiğlâl yirmi bin akçeye bana bey‘ ve teslîm eyledikde, ben dahi vakf-ı merkūm mâlı ile vech-i meşrûh üzre iştirâ ve edâ-yı semen edip, ba‘de’t-tahliyeti’ş-şer‘iyye sene-i merkūme şehr-i Ramazâni’l-mübâreki gurresinden senede ikişer bin beşer yüz akçe icâre-i müeccele ile istîcâr ve tesellüm eyledikden sonra cedîd akçe zuhûr edip, derâhim-i atîka kâside ve emr-i sultânî ile te‘âtîsi memnû‘ olmakla tesellümü müte‘azzir olup, şer‘an yevm-i bey‘de semen-i kâsidin altından kıymeti lâzım gelmekle, hesâb-ı mezkûr üzre asl-ı mâl olan yirmi bin kâsid akçe mukābelesinde mezbûr Osman Bey zimmetine elli bin altı yüz altmış altı cedîd akçe lâzım geldiğine hükm-i şer‘î lâhık olup, yedine hüccet-i şer‘iyye verilmekle, mezbûr Osman Bey ile’l-ân taraf-ı vakfa âid olan icâre-i menzili her sene vech-i meşrûh üzre edâ ve teslîm etmiş idi. El-hâletü hâzihî mezbûr Osman Bey zikr olunan elli bin altı yüz altmış altı akçe asl-ı mâl-ı merkūmu bana def‘ ve teslîm etmekle, ben dahi tevliyet-i mahkiyyem hasebiyle bi’t-tamâm ve’l-kemâl yedinden alıp vakf-ı merkūm için kabz ve tesellüm edip ve fekk-i rehin eyledim. Min ba‘d bâlâda zikri sebk eden derâhim-i atîka-i kâsidden mezbûr [Osman] Bey zimmetinde olan yirmi bin akçe asl-ı mâl vakıfdan bir akçe ve bir habbe kalmadı dedikde, mütevellî-i merkūm Hasan’ı ikrâr-ı meşrûhunda mezbûr Osman Bey dahi bi’l-muvâcehe tasdîk etmeğin, mâ vaka‘a bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Musa Bey el-bevvâbü’s-sultânî, Hasan Bey b. Abdullah er-Râcil, Yusuf b. Abdullah er-Râcil, İsmail b. Abdullah er-Râcil, Mehmed b. Ali.