Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 82 Hüküm no: 50 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed ve Mehmed Ali b. Sadi Çavuş kardeşler vasîsinin tereke davasında Abdullah Efendi b. Ahmed’i vekil tayin ettiği Vilâyet-i Anadolu’da Seferihisar nâm kasaba ahâlîsinden olup bundan akdem vefât eden merkūm Sadi Çavuş b. Mehmed’in verâseti, zevce-i metrûkesi Mahbûbe bt. Lütfullah nâm hâtun ve sulbî sagīr oğulları Mehmed ve bî-zebân Mehmed Ali’ye münhasır olduğu şer‘an mütehakkık oldukdan sonra sagīrân-ı merkūmânın li’l-ihtiyâc men lehü’n-nasb olan hâkim tarafından mansûb vasîleri olan fahrü kuzâti’l-islâm Abdurrahman Efendi b. Ahmed meclis-i şer‘-i hatîr-i lâzımü’t-tevkīrde, birâderi umdetü kuzâti’l-kirâm Abdullah Efendi b. Ahmed mahzarında takrîr-i kelâm edip hâlâ vasîsi olduğum sagīrân-ı mezbûrâna babaları müteveffâ-yı mezbûr Sadi Çavuş’dan irs-i şer‘î ile intikāl edip, hâlâ mezbûre Mahbûbe Hâtun vâzı‘atü’l-yed olduğu eşyâyı kassâm-ı askerî defteri mûcebince mezbûre Mahbûbe Hâtun’dan da‘vâ ve talebe ve ahz u kabze ve mezbûre ile huzûr-ı hükkâm-ı kirâmda mürâfa‘aya ve bu emr[in] mütevakkıf olduğu umûrun cümlesine birâderim mezbûr Abdullah Efendi’yi vekîl ve menâbıma nâib nasb ve ta‘yîn eyledim dedikde, ol dahi vekâlet-i mezbûreyi kabûl ve hizmet-i lâzımesini edâya müte‘ahhid olmağın, mâ hüve’l-vâki‘ bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Fahrü’l-kuzât es-Seyyid Mahmud Efendi b. Ahmed Efendi, Hidayetullah Efendi b. Mehmed, Hoca Mustafa b. el-Hâc Hasan, Abdullah Çelebi b. Yusuf, Hüseyin b. Sinan, el-Hâc Ali b. Musa, el-Hâc Ramazan b. Hacı Bâli, el-Hâc Ahmed b. Sefer Çavuş, el-Hâc Latif b. ( ), İbrahim b. Ramazan, Mehmed b. Habib.