Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 83 Hüküm no: 51 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Osman’ın İskenderiye’den yüklenen kahve bedeli davasının reddi Tüccâr tâifesinden Rıdvan b. Osman nâm kimesne meclis-i şer‘-i lâzımü’t-tevkīrde, işbu hâmilü’l-kitâb Mustafa Bey b. Memi nâm kimesne mahzarında üzerine takrîr-i da‘vâ edip, târih-i kitâbdan iki sene mukaddem diyâr-ı Mısriye’den medîne-i İskenderiye’de mezbûr Mustafa Bey her dengi üçer kantar ve dokuzar batman gelir iki denk kahve teslîm edip, bir dengi kendi kahve denkleri ile Maska oğlu demekle ma‘rûf reisin sefînesine ve bir dengi âhar sefîneye tahmîl eyle deyü emr eylemiş iken, mezbûr Mustafa benim emrime muhâlefet edip kendiye teslîm eylediğim iki dengi bile mezbûr Maska oğlu sefînesine tahmîl edip, hâlâ sefîne-i merkūme hâlik olup içinde olan metâ‘ zâyi‘ ve telef olmağın, benim emrime muhâlefet edip tahmîl eylediği bir denk kahvenin kıymet-i meşrûhası olan yetmiş üç riyâl guruşu merkūm Mustafa Bey’den taleb ederim dedikde, gıbbe’s-suâl mezbûr Mustafa Bey cevâbında müdde‘î-i mezkûr Rıdvan bana bir sefîneye tahmîl eyle deyü iki denk kahve teslîm edip, ben dahi kendi ile ma‘an zikr olunan Maska oğlu oğlunun sefînesine iki dengi bile tahmîl eyledik dedikde, gıbbe’l-istintâk mezbûr Rıdvan takrîr-i makāl edip zikr olunan iki denk kahveyi sefîne-i merkūmeye ma‘an tahmîl eyledik deyü i‘tirâf etmeğin, vech-i meşrûh üzre olan da‘vâsından men‘ olunup, mâ hüve’l-vâki‘ bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ahmed Bey b. Hüseyin, İbrahim Efendi b. Ahmed el-kadı, Şaban Çavuş b. ( ), Yusuf Çavuş b. Abdullah el-Mübâşir.