Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 84 Hüküm no: 52 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eskişehir Mustafa Paşa Câmii hatib ve mutemedinin vakıf mütevellîsinden vazifelerini aldıkları Medîne-i Üsküdar nevâhîsinden kasaba-i Gekvize’de câmi‘-i şerîfi olan merhûm ve mağfûrun leh Mustafa Paşa’nın vilâyet-i Anadolu’da Eskişehir nâm kasabada binâ eylediği câmi‘in berât-ı Pâdişâhî ile hatîbi olan Mevlânâ Mustafa b. Ali ve câmi‘-i mezkûrun vazîfe-i mu‘ayyene ile mu‘temedi olan Ahmed Dede b. el-Hâc Mustafa kendi nefislerinden asâleten ve câmi‘-i mezkûrun mürtezikaları olup, defter-i vakf-ı mezbûrda isimleri mastûr ve mukayyed olan kimesneler taraflarından husûs-ı âti’z-zikrde vekîl olup bimâ hüve nehcü’s-sübût şer‘an vekâletleri sâbite oldukdan sonra vekâleten meclis-i lâzımü’t-tevkīrde, hâlâ vakf-ı mezbûrun meşrûtiyyet üzre mütevellîsi olan fahrü’l-akrân Kasım Çelebi b. Osman mahzarında her biri ikrâr ve takrîr-i kelâm edip, bin kırk iki senesi Muharremü’l-harâmı gurresinden bin kırk üç Muharrem’i gurresine gelince câmi‘-i mezbûrun mesârifi için hasbe şarti’l-vâkıf on dokuz bin yüz otuz bir akçe ve ikimizin ve müvekkillerimizin sene-i merkūmede vazîfe-i mu‘ayyeneleri olmakla müstahık oldukları altmış bin dört yüz seksen akçe ki cem‘an yetmiş dokuz bin altı yüz on bir akçe olur meblağ-ı mezbûrun cümlesini merkūm Kasım Çelebi yedinden asâleten ve vekâleten bi’t-tamâm ve’l-kemâl ahz u kabz eyledik, sene-i merkūmede müstahık olduğumuz vazîfeden bizim ve müvekkillerimizin min ba‘d vakf-ı mezbûrda bir akçe ve bir habbe vazîfeleri bâkī kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ramazan Çelebi b. Şaban, Mustafa b. Mehmed, Mehmed Çelebi b. Mustafa, Mahmud b. Ahmed.