Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 84 Hüküm no: 53 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den intikal eden bağın müzâyedeyle Sâbiha Hatun bt. Yahya Çavuş’a satıldığı Mahmiye-i İstanbul’da Mehmed Paşa zâviyesinin şeyhi iken bundan akdem vefât eden merhûm Abdülkerim Efendi b. İbrahim’in verâseti, zevce-i metrûkeleri Hümâ bt. Ahmed’e ve Aişe bt. Mustafa’ya ve sulbî oğulları Pîr Mehmed Çelebi ve Abdülkerim Çelebi’ye ve sulbiye kebîre kızları Râbia ve Emetullah nâm hâtunlara ve sulbiye sagīre kızı Sâbiha’ya münhasıra olup, mezbûr Pîr Mehmed Çelebi sagīre-i mersûmenin tesviye-i umûru için cânib-i şer‘-i mutahhardan mansûb vasîsi olduğu hâkim-i muvakki‘ü’l-kitâb huzûrunda sâbit ve mütehakkık oldukdan sonra mezbûr Pîr Mehmed Çelebi kendi tarafından asâleten ve sagīre-i mersûme tarafından vesâyeten ve vâlidesi merkūme Aişe Hâtun ile hemşîresi Emetullah Hâtun taraflarından âti’z-zikr olan bağı bey‘a vekîl olup, mezbûrâtı ma‘rifet-i şer‘iyye ile ârifân Mehmed b. Ahmed ve Eyüb Çelebi b. Durak şehâdetleri ile hasm-ı câhid mahzarında vekâleti sâbite oldukdan sonra vekâleten merkūm Abdülkerim Çelebi dahi kezâlik kendi tarafından asâleten ve vâlidesi mezbûre Hümâ ile hemşîresi mesfûre Râbia Hâtun taraflarından kezâlik zikr-i âtî olan bağı bey‘a vekîl olup şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu sâhibetü’l-kitâb Sâbiha Hâtun bt. Yahya Çavuş tarafından ikrâr-ı âti’l-beyânı tasdîka vekîl olup, bimâ hüve nehcü’s-sübût şer‘an vekâleti sâbite olan Ömer Efendi b. Mustafa mahzarında her biri asâleten ve vekâleten ve vesâyeten ikrâr ve takrîr-i kelâm edip, müteveffâ-yı mezbûr muhallefâtından vilâyet-i Anadolu’da Yoros kazâsına tâbi‘ Kale-i cedîd sınırı dâhilinde vâki‘ bir tarafı Ebûbekir Kethüdâ b. Abdullah mülkü ve bir tarafı Berber demekle ma‘rûf nâm kimesne mülkü ve iki tarafı tarîk-i âm ile mahdûd olan bir kıt‘a bağı müteveffâ-yı mezbûrun zarûret-i düyûn-ı müsbetesi içün bey‘ lâzım geldikde, hasbe’l-âde beyne’t-tâlibîn nidâ ve müzâyede olunup ba‘de inkıtâ‘i ragabâti’n-nâs müvekkile-i mezbûre Sâbiha Hâtun üzerinde semeni misli olan elli bin akçede karâr edip ziyâde ile tâlib-i âhar olmamağın, zikr olunan bağı müvekkile-i mezbûreye tarafeynden îcâb ve kabûlü hâvî bey‘-i bât-ı sahîh-i şer‘î ile altı bin nakd-i râyic fi’l-vakt akçeye bey‘ edip, ol dahi iştirâ ve kabûl eyledikden sonra semeni olan meblağ-ı mezbûru yedinden bi’t-tamâm ve’l-kemâl ahz u kabz edip, bey‘-i mezbûru mahallinde kabza müşterîye-i mezbûreyi taslît eyledik. Ba‘de’l-yevm zikr olunan bağ mülk-i müşterâsıdır, keyfe mâ teşâ ve tahtâr mutasarrıfe olsun dediklerinde mukırrân-ı merkūmânın asâleten ve vekâleten ve vesâyeten cârî ve sâdır olan ikrârların vekîl-i mezbûr Ömer Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l yevmi’s-sâdis ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Efendi b. Mehmed el-Hatîb, Mehmed Efendi b. Memi el-Müderris, Ahmed Efendi b. Vildan el-Müderris, Sinan b. Mustafa, Eyüb b. Durak, Hızır b. Ali, Ebûbekir b. Kaya, Hüseyin b. Yahya, es-Seyyid Mustafa b. es-Seyyid Ahmed, Ali b. Mehmed.