Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 85 Hüküm no: 54 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den miras bağın müzâyede ile Halil’e satıldığı Mahmiye-i İstanbul’da Mehmed Paşa zâviyesinin şeyhi iken bundan akdem vefât eden merhûm Abdülkerim b. İbrahim’in verâseti, zevce-i metrûkeleri Hümâ bt. Ahmed’e ve Aişe bt. Mustafa’ya ve sulbî kebîr oğulları Pîr Mehmed Çelebi ve Abdülkerim Çelebi’ye ve sulbiye kebîre kızları Râbia ve Emetullah nâm hâtunlara ve sulbiye sagīre kızı Sâbiha’ya münhasıra olup mezbûr Pîr Mehmed Çelebi sagīre-i mersûmenin tesviye-i umûru için cânib-i şer‘-i mutahhardan mansûb vasîsi olduğu hâkim-i muvakki‘ü’l-kitâb huzûrunda sâbit ve mütehakkık oldukdan sonra mezbûr Pîr Mehmed Çelebi kendi tarafından asâleten ve sagīre-i mersûme tarafından vesâyeten ve vâlidesi merkūme Aişe Hâtun ile hemşîresi Emetullah Hâtun taraflarından âti’z-zikr olan bağı bey‘a vekîl olup, mezbûrânı ma‘rifet-i şer‘iyye ile ârifân olan Eyüb b. Durmuş ve Sinan b. Mustafa şehâdetleri ile hasm-ı câhid mahzarında vekâleti sâbite oldukdan sonra vekâleten ve merkūm Abdülkerim Çelebi dahi kezâlik kendi tarafından asâleten ve vâlidesi mezbûre Hümâ ile hemşîresi mesfûre Râbia Hâtun taraflarından kezâlik zikr-i âtî olan bağı bey‘a vekîl olup, şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu hâmilü’l-kitâb Halil b. ( ) nâm kimesne tarafından ikrâr-ı âti’l-beyânı tasdîka vekîl olup, bimâ hüve nehcü’s-sübût şer‘an vekâleti sâbite olan Ömer Efendi b. Mustafa mahzarında her biri asâleten ve vesâyeten ve vekâleten ikrâr ve takrîr-i kelâm edip, müteveffâ-yı mezbûr muhallefâtından vilâyet-i Anadolu’da Yoros kazâsına tâbi‘ Kale-i cedîd sınırı dâhilinde ve Dolaypınar? nâm mevzi‘ kurbunda vâki‘ bir tarafı Osman Beşe b. ( ) mülkü ve bir tarafı Sinan Beşe b. ( ) mülkü ve iki tarafı tarîk-i âm ile mahdûd olan bir kıt‘a bağı müteveffâ-yı mezbûrun zarûret-i düyûn-ı müsbetesi için bey‘ lâzım geldikde hasbe’l-âde beyne’t-tâlibîn nidâ ve müzâyede olunup, ba‘de inkıtâ‘i ragabâti’n-nâs müvekkile-i mezbûr Halil üzerinde semeni misli olan iki bin akçede karâr edip ziyâde ile tâlib-i âhar olmamağın, zikr olunan bağı müvekkil-i merkūm tarafeynden îcâb ve kabûlü hâvî bey‘-i bât-ı sahîh-i şer‘î ile iki bin nakd-i râyic fi’l-vakt akçeye bey‘ edip, ol dahi iştirâ ve kabûl eyledikden sonra semeni olan meblağ-ı mezbûru yedinden bi’t-tamâm ve’l-kemâl ahz u kabz edip, mebî‘-i mezbûru mahallinde kabza müşterî-i mezbûr Halil’i taslît eyledik. Ba‘de’l-yevm zikr olunan bağ mülk-i müşterâsıdır, keyfe mâ yeşâ ve yahtâr mutasarrıf olsun dediklerinde, mukırrân-ı merkūmânın asâleten ve vekâleten cârî ve sâdır olan ikrârların vekîl-i mezbûr Ömer Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l yevmi’s-sâdis ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Efendi b. Mehmed el-Hatîb, Mehmed Efendi b. Memi el-Müderris, Ahmed Efendi b. Vildan el-Müderris, Sinan b. Mustafa, Eyüb b. Durak, Hızır b. Ali, Ebûbekir b. Kaya, Hüseyin b. Yahya, es-Seyyid Mustafa b. es-Seyyid Ahmed, Ali Ağa b. Mehmed.