Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 87 Hüküm no: 55 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cezâyir’de ölen İbrahim Bey b. Kurd Çelebi’nin vârisinin eski Cezâyir beylerbeyisi Yunus Paşa’dan alacak davasının reddi Mahmiye-i Galata muzâfâtından kasaba-i Kasımpaşa sükkânından olup deryâ Beylerinden olmakla bundan akdem Cezâyir’de müteveffâ olan İbrahim Bey b. Kurd Çelebi nâm kimesnenin sulbiye kızı ve bi tarîki’l-hasr vârisesi olan Fâtıma Hâtun tarafından husûs-ı âti’l-beyâna vekîl olup, vekâleti mahzar-ı hasm-ı câhidde Ömer Efendi b. Ömer ve Mustafa Efendi b. Ahmed nâm kimesneler şehâdetleri ile sâbite olan Mustafa Efendi b. Hasan el-Müderris meclis-i şer‘-i hatîrde, mukaddemâ Cezâyir Beylerbeyisi olan emîrü’l-ümerâ’i’l-kirâm sâhibü’l-izzi ve’l-ihtişâm Yunus Paşa b. ( ) mahzarında bi’l-vekâle takrîr-i da‘vâ edip, mezbûr İbrahim Bey bundan esbak müteveffâ oldukda Cezâyir’de vâki‘ olan muhallefâtdan on dokuz bin beş yüz esedî guruş dokuz buçuk vakıyye külçe gümüş ve üç yüz dirhem sikke altını Cezâyir kulu bölükbaşılarından isimleri ma‘lûmum değil on iki nefer kimesne kabz ve zabt edip, her biri kendinin hâtemiyle hâtemleyip anda bezzâzistân ahâlîsinden bir kimesneye bi tarîki’l-vedî‘a teslîm eylediklerinden sonra müteveffâ-yı merkūmun veresesi gelip eşyâ-i merkūmeyi kabz eylesinler deyü mektûb irsâl etmişler iken mûmâ-ileyh Yunus Paşa ol târihde Cezâyir Beylerbeyisi olmakla Cezâyir kulunun mevâcibleri husûsunda müzâyaka vardır deyü muhallefât-ı merkūmeyi vech-i meşrûh üzre zabt eden kimesneden gasben ve cebren alıp kabz eylemiş imiş. Elân vekâleten mahkiyyem hasebiyle mûmâ-ileyhden taleb ederim dedikde, gıbbe’l-istintâk mûmâ-ileyh Yunus Paşa husûs-ı mezbûru bi’l-külliye inkâr eylediğinden mâ‘adâ vekîl-i merkūm Mustafa muhallefât-ı merkūmeyi zikr olunan on iki nefer kimesne kabz ve vaz‘-ı yed edip bi tarîki’l-vedî‘a âhara teslîm eylediklerine mu‘terif olmakla bi hasebi’ş-şer‘ vâzı‘u’l-yed olanlardan taleb olunup, evvelâ paşa-yı müşârunileyhden talebe mesâğ-ı şer‘î olmamakla vekîl-i merkūm Mustafa muhallefât-ı merkūmeyi ibtidâ kabz ve vaz‘-ı yed edenlerden taleb edip ber vech-i şer‘î mûmâ-ileyh Yunus Paşa’ya ta‘arruz etmemek için tenbîh olunup, [mâ] vaka‘a bi’t-taleb ketb olundu. Tahrîren fî evâil şehri Zilhicceti’l-harâm li sene isneteyn ve erba‘în ve elf. Şuhûdü’l-hâl: Yusuf Bey b. Arif el-bevvâb, Fahrü’l-a‘yân İsmail Ağa b. Abdullah el-müteferrika, Tulumcu Mehmed Çavuş el-Mübâşir, Haydar Çavuş b. Abdullah, Mansur b. Abdi.