Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 89 Hüküm no: 57 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc İbrahim b. Nasuh’un vârislerinin alacak davası açtıkları Kadı Abdülhay Efendi b. Mustafa’ya mehil verildiği Mahmiye-i Kostantıniyye’de Ayakapısı kurbunda Kâtib Şemsî mahallesinde bundan akdem müteveffâ olan el-Hâc İbrahim b. Nasuh nâm kimesnenin sulbiye kızları ve bi tarîki’l-hasr vâriseleri olan Amine ve Hatice ve Aişe nâm sagīrelerin li’l-ihtiyâc men lehü’n-nasb olan hâkim tarafından mansûb vasîleri olan bâ‘isü’l-kitâb Halil Efendi b. el-Hâc Abdullah meclis-i şer‘de, Rumeli kuzâtından Abdülhay Efendi b. Mustafa mahzarında bi’l-vesâye takrîr-i da‘vâ edip, mezbûr Abdülhay Efendi bundan akdem müteveffâ-yı merkūm el-Hâc İbrahim’den hâl-i hayâtında bi tarîk-i karzi’ş-şer‘î yüz altmış riyâl guruş alıp kabz ettiğine müslimîn huzûrunda i‘tirâf eylediğinden mâ‘adâ yedine hat ve hâtemi müştemile ve deyn-i merkūme i‘tirâfını nâtıka tezkire verdiğinden sonra mezbûr el-Hâc İbrahim müteveffâ olup, meblağ-ı merkūm vech-i mersûm üzre sulbiye kızları sıgār-ı merkūmûna intikāl etmekle bi’l-vesâye taleb eylediğinde edâdan imtinâ‘ etmeğin, yedimde olan tezkireye nazar olunup mûcebince alıverilmek taleb ederim deyü takrîr-i meşrûhuna mutâbıka ve merkūm Abdülhay Efendi’nin hat ve hâtemini hâviye ve deyn-i merkūma i‘tirâfını nâtıka tezkire îrâd edicek, gıbbe’s-suâl mezbûr Abdülhay Efendi cevâbında, fi’l-vâki‘ zikr olunan tezkire benim hattım olup müslimîn huzûrunda dahi deyn-i merkūma i‘tirâf eyledim idi. Lâkin deynim ancak altı? bin akçe olup mezbûr el-Hâc İbrahim hâl-i hayâtında [ve] zarûretim esnâsında beni ahz ve deyn-i merkūmu taleb eyledikce, ben dahi bir mikdâr meblağ da‘vâ etmeğimle bi tarîki’r-ribâ ziyâde olunup yüz altmış guruş deynim vardır deyü i‘tirâf etmiş idim, şuhûdum vardır ihzâr edeyim deyü istimhâl etmek ile mehil-i şer‘î verilip, mâ vaka‘a bi’t-taleb ketb olundu. Tahrîren fî sâlisi Muharremi’l-harâm li sene selâsin ve erba‘în ve elf min hicreti men lehü’l-izz ve’ş-şeref. Şuhûdü’l-hâl: Mehmed Efendi b. Şaban el-İmâm, İsmail Efendi b. Muharrem, Ahmed b. Ali el-Müezzin, Derviş Çelebi b. Abdullah ve gayruhüm.