Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 91 Hüküm no: 59 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Mehmed’in kürk bedelinden el-Hâc Abdülkâdir b. el-Hâc Mehmed’i borçlu olduğu Tüccâr tâifesinden işbu bâ‘isü’l-kitâb el-Hâc Abdülkādir b. el-Hâc Mehmed nâm kimesne meclis-i şer‘de, dergâh-ı âlî yeniçerilerinden Hasan Beşe b. Mehmed nâm kimesne mahzarında takrîr ve da‘vâ edip, bundan akdem silk-i mülkümde olup biri neftî çukaya kaplı ve biri darçini renkli pars çukaya kaplı iki samur kürkü mezbûr Hasan Beşe’ye safka-i vâhide ile bâtten yüz dokuz bin akçeye bey‘ ve teslîm edip, semenlerini târih-i kitâb senesi Şa‘bânü’l-mu‘azzamı gurresinden iki ay tamâmına değin te’cîl eyledikde mezbûr Hasan Beşe müslimîn huzûrunda bin kırk iki senesi Şa‘bânü’l-mu‘azzamı gurresinden iki ay tamâmına değin müeccel iki samur kaplı ferâce bahâsından yüz dokuz bin akçe deynim vardır deyü kirâren ve mirâren ikrâr ve i‘tirâf dahi edip ve ecel-i merkūm hulûl edeli üç aydan ziyâde olmuş iken mezbûr Hasan Beşe meblağ-ı merkūmu edâdan imtinâ‘ eder mezbûrun i‘tirâfına elân şuhûdum istimâ‘ olunup alıverilmek taleb ederim dedikde, gıbbe’s-suâl mezbûr Hasan Beşe husûs-ı mezbûru bi’l-külliye münkir olup, müdde‘î-i merkūm el-Hâc Abdülkādir’den da‘vâsına mutâbıka beyyine taleb olundukda, udûl-i müslimînden Hasan Efendi b. İbrahim ve Abdülaziz Efendi b. Hüseyin nâm kimesneler li ecli’ş-şehâde hâzırân olup gıbbe’l-istişhâd, fi’l-vâki‘ mezbûr Hasan Beşe bundan akdem bin kırk iki senesi Şa‘bânü’l-mu‘azzamı gurresinden iki ay tamâmına değin müeccel iki samur kaplı ferâce bahâsından mezbûr el-Hâc Abdülkādir’e yüz dokuz bin akçe deynim vardır deyü kirâren ve mirâren ikrâr ve i‘tirâf eyledi idi. Mezbûr Hasan Beşe’nin minvâl-i muharrer üzre sudûr eden i‘tirâfına şâhidleriz şehâdet dahi ederiz deyü edâ-i şehâdet-i şer‘iyye ettiklerinde, ba‘de ri‘âyet-i şerâiti’l-kabûl şehâdetleri makbûle olmağın mûcebiyle edâsına tenbîh olunup, mâ vaka‘a bi’t-taleb ketb olundu. Fî selh-i Zilhicceti’l-harâm min şuhûri li sene isneteyn ve erba‘în ve elf. Şuhûdü’l-hâl: Hüseyin b. Mehmed, Haydar Çavuş b. Abdullah, Mustafa b. Mehmed, Mansur b. Hızır, el-Hâc Ahmed b. Abdi, Ömer Efendi b. Hacı.