Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 92 Hüküm no: 60 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melik v. Serkis’in Mehmed b. İsmail’e borçlu olduğu İşbu hâmilü’l-kitâb Mehmed b. İsmail nâm kimesne meclis-i şer‘-i hatîr-i lâzımü’t-tevkīrde, Melik v. Serkis nâm Ermeni muvâcehesinde üzerine takrîr-i da‘vâ edip, mezbûr Melik zimmetinde cihet-i deyn-i şer‘îden iki yüz elli kıt‘a riyâl guruş hakkım vardır, hattâ mahzar-ı müslimînde deyn-i mezkûru i‘tirâf eylediğinden mâ‘adâ yedime hat ve hâtemini müştemile tezkire dahi vermişdir, suâl olunup alıverilmek matlûbumdur deyü [bir kıt‘a tezkire ibrâz edip nazar olundukda] mezkûr Melik’in hat ve hâtemini müştemile ve mezbûr Mehmed’e iki yüz elli riyâl guruş deynim var demeği nâtıka bulunmakla, gıbbe’s-suâl mezbûr Melik zikr olunan tezkire kendinin idiğini i‘tirâf edip, lâkin vech-i meşrûh üzre olan i‘tirâfımda kâzibim dedikde, hazret-i Ebî Yusuf’un kavl-i şerîfi ki hâlâ fî zamâninâ müftâ-bihdir, mezbûr Mehmed merkūm Melik vech-i meşrûh üzre olan i‘tirâfında kâzib olmadığına yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mezbûr Melik meblağ-ı mezbûrun edâsıyla ilzâm olunup, mâ hüve’l-vâki‘ bi’t-taleb ketb olundu. Tahrîren fî evâhiri’l-Muharremi’l-harâm li sene selâsin ve erba‘în ve elf. Şuhûdü’l-hâl: Abdi Bey b. Hasan, Cafer b. Abdullah, Yahya Çelebi b. Hasan, Osman b. Cafer.