Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 105 Hüküm no: 80 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterdâr İbrahim Efendi’nin eski Tırhala sancakbeyi Ataullâh Bey b. Durak’dan alacak davasının reddi Atebe-i aliyye-i sultâniyede hâlâ şıkk-ı evvel defterdârı olan zü’l-kadri’r-refî‘ ve’l-câhi’l-menî‘ İbrahim Efendi b. ( ) meclis-i şer‘-i hatîr-i lâzımü’t-tevkīrde, sâbıkan Tırhala sancağı beyi olan iftihârü’l-ümerâ Ataullah Bey b. Durak mahzarında üzerine takrîr-i da‘vâ edip, bundan akdem mağdûben katl olunan Lâzimeli? demekle ma‘rûf Hüseyin Ağa b. ( ) hâl-i hayâtında mezbûr Ataullah Bey’e bi tarîki’l-karzi’ş-şer‘î yüz bin nakd-i râyic fi’l-vakt akçe verip ve beynlerinde mikdârı ve zirâ‘ı ilm-i şer‘le ma‘lûm çuka bahâsından dahi yirmi bin mezbûru’n-na‘t akçe cem‘an maktûl-i mezbûrun merkūm Ataullah Bey zimmetinde yüz yirmi bin akçe hakkı olup, kable’l-istîfâ katl olunup zâhirde vâris-i ma‘rûfu olmamakla muhallefâtı cânib-i mîrîye âid olmağın, meblağ-ı mezbûr yüz yirmi bin akçeyi mezbûr Ataullah Bey’den taleb ederim suâl olunsun dedikde, gıbbe’s-suâl mezbûr Ataullah Bey cevâbında, fi’l-hakīka hâl minvâl-i meşrûh üzre olup, zimmetimde müteveffâ-yı mezbûr Hüseyin Ağa’ya cihet-i karz ve çuka bahâsından yüz yirmi bin akçe deynim var idi. Lâkin hâl-i hayâtında meblağ-ı mezbûru istîfâya vekîli olan Yemenli demekle ma‘rûf Hüseyin Bey b. ( ) nâm cündîye meblağ-ı mezbûru bi’t-tamâm edâ ve teslîm edip, ol dahi alıp kabz edip zimmetim berî olmuşdur dedikde, gıbbe’l-istintâk ve akībe’l-inkâr mezbûr Ataullah Bey’den sıdk-ı kelâmına beyyine taleb olundukda, udûl-i ricâlden eş-Şeyh Abdullah Efendi b. Mehmed ve Seyfi b. Mahmud el-müstefîd li ecli’ş-şehâde meclis-i şer‘-i şerîfe hâzırân olup ba‘de’l-istişhâd, fi’l-vâki‘ maktûl-i mezbûr Hüseyin Ağa’nın hâl-i hayâtında meblağ-ı mezbûr yüz yirmi sekiz akçeyi istîfâya vekîli olan Hüseyin Bey b. ( ) nâm cündî meblağ-ı mezbûr yüz yirmi bin akçeyi bi’t-tamâm ve’l-kemâl bizim huzûrumuzda mezbûr Ataullah Bey’den alıp kabz eyledi. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mûcebi ile müşârunileyh İbrahim Efendi meblağ-ı mezbûr mütâlebesinden men‘ olunup mâ hüve’l-vâki‘ bi’t-taleb ketb olundu. Tahrîren fî evâsıti’l-Muharremi’l-harâm li sene selâsin ve erba‘în ve elf. Şuhûdü’l-hâl: Fahrü’l-a‘yân Yusuf Ağa b. ( ), Veli Ağa b. Mustafa, Mehmed Beşe b. ( ), el-Hâc Abbas b. İbrahim.