Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 106 Hüküm no: 81 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın ölen kocasının diğer hanımı Üftâde’den alacaklı olduğu Dîvân-ı hümâyûn-ı sa‘âdet-makrûn tarafından buyuruldı-i şerîf ile husûs-ı âti’z-zikrin mahall-i Câbî’de istimâ‘ ve fasl olunması için cânib-i şer‘den adam gönderilmek fermân olundukda bu fakīr ta‘yîn buyurulmağın, emrü men lehü’l-emr ile saray-ı sa‘âdet Saray-ı atîk-i sultânîye varılıp iftihârü’l-havâs ve’l-mukarrebîn sâhibü’l-izzi ve’t-temkîn saray-ı mezkûr ağası olan hazreti Abbas Ağa huzûr-ı şerîflerinde akd-i meclis-i şer‘ olundukda, bundan akdem müteveffâ olan Sütçüzâde demekle ma‘rûf merhûm Mustafa Ağa b. ( ) zevce-i metrûkesi olan Hatice bt. Abdullah nâm hâtun, müteveffâ-yı mezkûrun zevce-i metrûke-i uhrâsı olup, sulbiye sagīre kızı Fâtıma’nın vâlidesi ve tesviye-i umûruna kıbel-i şer‘den vech-i şer‘î ile mansûbe vasîsi olan Üftâde nâm hâtun mahzarında üzerine takrîr-i da‘vâ edip, ben müteveffâ-yı mersûma hâl-i hayâtında kendi[ne] hâlis mâldan bey‘ eylemek için beynimizde ma‘lûm bir dibâ ve bir zerkûbe ve bir incili kaftan yakası ve aded ve vasfı ma‘lûm bir dizi inci vermiş idim. Mezbûr dahi eşyâ-i mezkûrenin mecmû‘unu otuz dört bin nakd-i râyic fi’l-vakt akçeye ki yüz elli guruş riyâlî ve mâ‘adâsı hurda cedîd ve ceyyid akçe idi bey‘ edip, meblağ-ı mezbûru’n-na‘tı getirip bana bi’t-tamâm teslîm eyledikden sonra aynı ile meblağ-ı mezkûru’l-vasfı benden istikrâz edip, ben dahi ikrâz ve teslîm ol dahi kabz ve tesellüm eyleyip meblağ-ı mezkûr zimmetinde iken fevt olmağın, hâlâ müteveffâ-yı mezkûrun muhallefâtı mezkûrenin yedinde makbûze olmakla meblağ-ı mevsûf-ı mezkûru mezbûre Üftâde’den taleb ederim dedikde, müşârunileyhâ Üftâde müteveffâ-yı mezkûrun muhallefâtına vâzı‘atü’l-yed idiğine mukırra ve mûmâ-ileyhâ Hatice’nin da‘vâ-yı meşrûhasını münkire olıcak, müdde‘iyye-i mezkûreden da‘vâsını mübeyyine beyyine taleb olundukda, udûl-i müslimînden kasaba-i Tophâne’de Kuloğlu mahallesinde sâkin Mustafa Çelebi b. Mehmed el-Cündî ve Ferruh Çavuş b. Şaban nâm kimesneler li ecli’ş-şehâde meclis-i şer‘-i şerîfe hâzırân olup gıbbe’l-istişhâdi’ş-şer‘î bi’l-muvâcehe edâ-i şehâdet-i şer‘iyye edip, fi’l-hakīka müteveffâ-yı sâlifü’z-zikr mezbûre Hatice’nin eşyâ-i mezkûresini yüz elli guruş riyâlî ve mâ‘adâsını cedîd ceyyid akçe olmak üzre otuz dört bin akçeye bey‘ edip, meblağ-ı mezbûru getirip mezbûreye teslîm eyledikden sonra aynı ile meblağ-ı mezbûr otuz dört bin men‘ût akçeyi merkūm Mustafa Ağa’ya ba‘de’l-istikrâz bizim huzûrumuzda ikrâz ve teslîm ve ol dahi kabz ve tesellüm eyledi idi. Müdde‘iyye-i [17a] mezkûre için muhallefât-ı merkūmeden zikr olunan otuz dört bin akçeyi hakk-ı taleb ve ahz vardır. Biz bu husûsa vech-i şer‘î üzre şâhidleriz şehâdet dahi ederiz dediklerinde, ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra ba‘de’t-tahlîfi’ş-şer‘î muhallefât-ı mezkûreden meblağ-ı mezbûru’n-na‘tı Hatice-i mezkûreye edâ etmek için merkūm Üftâde’ye tenbîh-i şer‘î olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer mine’l-Muharremi’l-harâm li sene selâsin ve erba‘în ve elf. Şuhûdü’l-hâl: Fahrü’l-a‘yân Mahmud Ağa b. ( ) es-Sarrâc, Fahrü’l-akrân Mahmud Ağa b. ( ) el-Müezzin el-Cündî, İbrahim Ağa b. ( ) el-Cündî, Murad b. ( ) kayıkçı, Ali b. ( ) kayıkçı.