Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 115 Hüküm no: 92 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Surre emini Mahmud Ağa b. Ali’nin Şifâ Mehmed Ağa’daki alacağını vârislerinden tahsil ettiği Hâlâ Surre emîni olan fahrü’l-akrân Mahmud Ağa b. Ali tarafından husûs-ı âti’z-zikre vekîl olup, hasm-ı câhidü’l-vekâle mahzarında bimâ hüve nehcü’s-sübût şer‘an vekâleti sâbite olan fahrü’l-akrân Mehmed Çavuş b. Mustafa meclis-i şer‘-i şerîfde, bundan akdem mağsûben katl olunan Şifâ Mehmed Ağa’nın sulbî sagīr oğulları Mustafa ve Ahmed’in tesviye-i umûruna kıbel-i şer‘den mansûb vasî olan işbu hâmilü’l-kitâb Hasan Ağa b. Ali mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp, müvekkilim mezbûr Mahmud Ağa’nın maktûl-i mezbûr Şifâ Mehmed Ağa’nın zimmetinde cihet-i karz-ı şer‘îden bin kıt‘a riyâl guruş hakkı olup, ba‘de vefâtihî meblağ-ı mezbûr bin riyâlî guruşu muhallefâtına vâzı‘u’l-yed olan sagīrân-ı mezbûrânın vasîleri mesfûr Hasan Ağa’dan taleb eyledikde, ol dahi inkâr edip vekâletimi ve meblağ-ı mezbûru şuhûd-ı udûl ile isbât eyledikden sonra meblağ-ı mezbûrun doksan iki bin nakd-i râyic fi’l-vakt akçesini vasîyy-i mezbûr yedinden müvekkil-i merkūm için alıp kabz eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî min Saferi’l-hayr li sene selâsin ve erba‘în ve elf. Şuhûdü’l-hâl: Fahrü’l-a‘yân Yusuf Ağa b. Kadı reisü’l-muhzırîn, Veli Bey b. ( ), Mehmed Beşe b. ( ), Kurd b. Hasan.