Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 116 Hüküm no: 93 Orijinal metin no: [18b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın evini bey‘ bi’l-istiğlâl ile Mustafa ve Ahmed adlı küçüklere sattığı Mahmiye-i Kostantıniyye’de vâki‘ Topkapısı kurbundaki Fâtıma Sultan mahallesi ahâlîsinden Mustafa Beşe b. Abdullah nâm kimesne meclis-i şerî‘at-i şerîfe-i garrâda hâzır olup, sâlifü’z-zikr Fâtıma Sultan mahallesinde kâin olup iki tarafdan Mustafa Bey b. merhûm Siyavuş Paşa mülkü, diğer tarafdan Dülger Hüseyin mülkü ve tarîk-i âm ile mahdûd bulunan cemî‘-i menzilini cümle hudûdu ve kâffe-i hukūkuyla râyicü’l-vakt dokuz bin akçe semen-i mu‘ayyen-i makbûzla, hâl-i hayâtında mahmiye-i merkūme mahallâtından Hâce Paşa mahallesi kurbundaki Hacı Pîrî mahallesinde sâkin iken maktûlen fevt olan Mehmed’in Mustafa ve Ahmed nâm sagīreyn oğullarının tesviye-i umûrları için kıbel-i şer‘den mansûb vasî olan bâ‘isü’l-kitâb Hasan Bey b. Ali’ye bey‘ ettiğini ikrâr ve i‘tirâf etti. Vasîyy-i mezbûr da vesâyet-i mahkiyyesi hasebiyle, sagīreyn-i merkūmeynin mâlıyla ve istiğlâl maksadıyla menzil-i mezkûru ondan iştirâ etti. Bâyi‘-i mezbûrun menzil-i mezkûru icâreye almak istemesi üzerine vasîyy-i mezbûr, ba‘de’t-tahliye ve’t-tekābuz, zeyilde mezkûr ayın gurresinden bir sene tamâmına bin üç yüz elli akçe ücret-i kirâ ile icâreye verdi. Vâki‘ ikrâr, vasîyy-i merkūm tarafından vicâhen ve şifâhen tasdîk edildi. Merkūme Fâtıma Sultan mahallesinde sâkin olan müşterî-i mezkûrun kardeşleri Mehmed ve Hasan ibney Abdullah nâm kimesneler menzil-i mezbûrun derkine ve ücret-i kirâya îcâb ve kabûlü hâvî kefâlet ile kefil oldu. Cerâ zâlike ve hurrire fî evâili Safer el-muzaffer sene selâse ve erba‘în ve elf. Şuhûdü’l-hâl: Mustafa Halîfe b. Siyâmî el-İmâm, Musa Efendi b. Şükrullah el-Müderris, Mezid b. Şaban el-Müezzin, Hasan Çavuş b. Abdullah, Davud b. Ali, el-Hâc Abbas b. İbrahim …?, Receb b. Ahmed, Yusuf Ağa reisü’l-muhzırîn