Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 128 Hüküm no: 106 Orijinal metin no: [21a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha Hatun bt. İbrahim’in, kızını öldürdüğünü iddia ettiği Ahmed Beşe b. Mustafa ile sulh olduğu Mahrûse-i Galata mahallâtından Emek yemez mahallesinde sâkine olan ve mahrûse-i mezbûre muzâfâtından Kasımpaşa kasabasında bundan akdem maktûlen vefât eden Fâtıma bt. Mehmed nâm hâtunun annesi ve vârisi olan Saliha Hâtun bt. İbrahim nâm hâtun meclis-i şerî‘at-i şerîfe-i garrâda -sânehallâhu te‘âlâ ani’l-be’sâi- hâzıra olup, beraberinde de, Ahmed Beşe b. Mustafa er-Râcil kıbelinden tasdîka vekâleti İbrahim Çelebi b. Hüseyin ve Hüseyin Beşe b. Ali’nin şehâdetleri ile sâbit olan Musa Beşe b. Derviş nâm kimesneyi ihzâr edip vekîl-i merkūm mahzarında şöyle ikrâr ve i‘tirâf etti ki, vakt-i zamânında müvekkil-i mezbûrunun, mezkûre kızını amden katlettiğini iddi‘â etmiş o da bu iddi‘âyı inkâr etmişdi. Aralarında envâ‘-ı husûmet vâki‘ olup hâkim huzûrunda murâfa‘a olunduklarında delil ikāmesine imkân bulamayıp ityân-ı beyyineden âciz olmuşdu. Elân verâset-i mahkiyyesi hasebiyle müvekkil-i mezbûrla sulh oldu. O da râyicü’l-vakt üç bin akçe meblağ-ı ma‘kūd-i mu‘ayyen sulh bedeli ile icbâr ve ikrâhtan ârî olarak kendi rızâ ve ihtiyârıyla onunla sulh oldu. Müvekkil-i mezbûrun zimmetini cemî‘-i de‘âvî, mutâlebât, eymân ve muhâsamâtdan umûmen ve husûsen ibrâ etti. Vâki‘ ikrâr vekîl-i mezbûr tarafından vicâhen ve şifâhen tasdîk edildi. Cerâ zâlike ve hurrire fi’l-yevmi’l-âşir min Saferi’l-hayr sene selâse ve erba‘în ve elf. Şuhûdü’l-hâl: Osman Beşe b. Şaban el-Mübâşir, Mehmed Beşe b. Mustafa, Ali Beşe b. Musa er-Râcil, Süleyman Beşe b. Yakub, Mustafa b. Kurd, Hüseyin Bey b. Hasan el-Cündî, Ahmed Çavuş b. Veli, Mustafa Beşe b. Ahmed, Ahmed b. Mehmed el-Cündî, Bayram Beşe b. Abdullah er-Râcil, Hüseyin Bey b. Mustafa, fahrü’l-a‘yân Osman b. Ali Efendi el-kadı, Kapudan b. ( ), muharrirü’l-hurûf Mehmed Turâbî