Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 137 Hüküm no: 117 Orijinal metin no: [22b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Elyaz’ın kumaş ticaretinden Panayot’da alacağı olduğu Mahmiye-i İstanbul’da sâkin Yahûd tâyifesinden Katalan cemâ‘atinden Yasef v. Elyaz nâm Yahudi meclis-i şer‘-i hatîr-i lâzımü’t-tevkīrde, Panayot v. ( ) nâm zimmî muvâcehesinde üzerine takrîr-i da‘vâ edip, bundan akdem mezbûr Panayot benden iştirâ ve kabz eylediği her donluğu dörder zirâ‘ bir donluk darçini ve bir donluk kahve rengi ve bir donluk sünbülî ve bir donluk benefşe Paris çuka bahâlarından altmış dört riyâlî guruş ve her zirâ‘ı ikişer riyâlî guruşa altı zirâ‘ mâî ve beş zirâ‘ lâciverdî çuka bahâlarından yirmi iki riyâlî guruş cem‘an mezbûr Panayot zimmetinde seksen altı riyâlî guruş hakkım olup, hâlâ taleb eylediğimde vermede ta‘allül eder suâl olunup alıverilmek matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan sıdk-ı da‘vâsına beyyine taleb olundukda, Yahûd tâyifesinden olup Sinor cemâ‘atinden olan Salamon v. Royen ve Portakal cemâ‘atinden Kemal v. ( ) nâm Yahudiler li ecli’ş-şehâde meclis-i şer‘-i kadîme hâzırân olup gıbbe’l-istişhâd, fi’l-vâki‘ müdde‘î-i mezbûr Yasef bizim huzûrumuzda mezkûr Panayot’a altmış dört riyâl guruşu her donluğu dörder zirâ‘ gelir bir donluk darçini ve bir donluk kahve rengi ve bir donluk sünbülî ve bir donluk benefşe Paris çuka ve her zirâ‘ı ikişer riyâlî guruşa altı zirâ‘ mâ’î ve beş zirâ‘ lâciverdî çuka bey‘ ve teslîm edip, ol dahi iştirâ ve tesellüm eyledi. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye ettiklerinde, ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mûcebi ile mezbûr Panayot meblağ-ı mezbûr seksen altı guruşun edâsıyla ilzâm olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min Saferi’l-hayr li sene selâsin ve erba‘în ve elf. Şuhûdü’l-hâl: Yusuf Ağa, Mehmed Çelebi, Mehmed Beşe b. Yusuf, Ali b. ( ).