Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 138 Hüküm no: 119 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mitrak v. Bağdasar’ın Serkis v. Aydın’a olan borcunu ödediği Vilâyet-i Anadolu’da Erzurum kazâsında Erzincan kasabasından Serkis v. Aydın nâm Ermeni zimmî meclis-i şer‘-i hatîr-i lâzımü’t-tevkīrde, kasaba-i merkūme sükkânından işbu hâmilü’l-kitâb Mitrak v. Bağdasar nâm Ermeni zimmî muvâcehesinde bi tav‘ihî ikrâr ve takrîr-i kelâm edip, bundan akdem merkūm Mitrak zimmetinde deyn-i şer‘îden olan sekiz yüz riyâl guruş hakkımın dört yüz guruşunu mukaddemâ Erzurum’da ve iki yüz guruşunu hâlâ bunda mezbûr Mitrak’ın yedinden alıp kabz etmekle zimmetinde iki yüz guruşum bâkī kaldı idi. El-hâletü hâzihî zikr olunan iki yüz guruş hakkımı mezbûr Mitrak’a hibe-i sahîha-i şer‘iyye ile hibe ve temlîk eylediğimde, mezbûr Mitrak dahi vech-i meşrûh üzre ittihâb ve kabûl etmekle zikr olunan sekiz yüz guruşdan mezbûr Mitrak zimmetinde bir akçe ve bir habbe hakkım kalmayıp, mezbûr Mitrak’ın zimmetini husûs-ı mezbûrdan bi’l-külliye ibrâ-i âmm-ı kātı‘u’n-nizâ‘la ibrâ ve iskāt eyledim dedikde, mukırr-ı merkūm Serkis’i kelimât-ı meşrûhasında merkūm Mitrak dahi bi’l-muvâcehe tasdîk ve ittihâb ve kabûl eylediğin tasdîk edicek, mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Saferi’l-mu‘azzam li sene selâsin ve erba‘în ve elf. Şuhûdü’l-hâl: Mehmed Bey b. Yusuf çukadâr, Mustafa Çavuş el-Mübâşir, Yusuf Bey b. Abdullah, Yusuf b. Abdullah el-muhzır, Mansur b. Hızır.