Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 139 Hüküm no: 120 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İdam edilen Defterdâr Mustafa Paşa’nın mühürdârı Murad Bey b. Abdullah’da başbâkîkuluna intikal edecek paranın kalmadığı Hâlâ başbâkīkulu olan fahrü’l-akrân Ahmed Ağa b. Abdülmennân meclis-i şer‘-i hatîr-i lâzımü’t-teşrîfde, bundan akdem şıkk-ı evvel defterdârı iken mağdûben katl olunan Mustafa Paşa’nın mühürdârı olan işbu hâmilü’l-kitâb Murad Bey b. Abdullah mahzarında üzerine takrîr-i da‘vâ edip, bundan evvel beynimizde ma‘lûm husûs için maktûl-i mezbûr Mustafa Paşa’ya îsâl eyle deyü mezbûr Murad Bey’e yetmiş bin nakd-i râyic fi’l-vakt akçe def‘ ve teslîm edip, ol dahi kabz eyleyip ba‘dehû mezbûr Mustafa Paşa katl olunup husûs-ı mezbûrun husûlü olmamakla, meblağ-ı mezbûr yetmiş bin akçeyi hâlâ mezbûr Murad Bey’den taleb ederim dedikde, gıbbe’s-suâl mezbûr Murad Bey cevâbında, fi’l-hakīka müşârunileyh Ahmed Ağa yedinden vech-i meşrûh üzre yetmiş bin akçe alıp kabz eylemiş idim. Lâkin meblağ-ı mezbûru maktûl-i mezbûra hâl-i hayâtında me’mûr olduğum üzre bi’t-tamâm def‘ ve teslîm edip yedimde meblağ-ı mezbûrdan bir akçe ve bir habbe bâkī kalmadı dedikde, mezbûr Murad Bey resûl olup meblağ-ı mezbûru mezkûr Mustafa Paşa’ya hâl-i hayâtında def‘ ve teslîm eyledim dediğinde yemîni ile musaddak olmağın, müdde‘î-i mezbûr talebi ile meblağ-ı mezbûr yetmiş bin akçeyi merkūm Mustafa Paşa’ya bi’t-tamâm ve’l-kemâl def‘ ve teslîm edip yedinde kalmadığına mezkûr Murad Bey’e yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘i aşer min Saferi’l-hayr li sene selâsin ve erba‘în ve elf. Şuhûdü’l-hâl: Mehmed Bey b. Mahmud el-Cündî, Zülfikar b. Abdullah el-Cündî, Ahmed Çavuş b. ( ), Mehmed Ağa b. ( ) reisü’l-muhzırîn, Yusuf Ağa b. ( ) reisü’l-muhzırîn.