Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 140 Hüküm no: 121 Orijinal metin no: [23a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tabib Yehûd v. Nesimi ile David v. Menahem ve David v. Avraham’ın birbirlerinin zimmetini ibrâ ettiği Mahmiye-i İstanbul’da sâkin Yehûd tâyifesinden Sisilye cemâ‘atinden David v. Menahem ve La‘lî cemâ‘atinden David v. Avraham nâm Yahudiler meclis-i şer‘-i hatîr-i lâzımü’t-tevkīrde, işbu hâmili’s-sifr etıbbâ-i Yahudi’den Yehûd v. Nesimî muvâcehesinde her biri bi’t-tav‘i’s-sâf ikrâr ve i‘tirâf edip, bundan akdem mezbûr Yehûd ile târih-i kitâba gelince beynimizde ba‘zı mu‘âmelât ve ahz u i‘tâ vâki‘ olmuş idi. El-hâletü hâzihî her birimizin mezbûr Yehûd zimmetinde bir akçe ve bir habbe hakkımız olmayıp, mezbûr[un] zimmetini ibrâ-i âm ile ibrâ ve iskāt-ı tâm eyledik. Ba‘de’l-yevm bizden merkūm Yehûd üzerine bir vechile da‘vâ ve nizâ‘ sudûr ve zuhûr ederse, lede’l-hükkâmi’l-kirâm mesmû‘a ve makbûle olmaya dediklerinde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Saferi’l-hayr li sene selâsin ve erba‘în ve elf. Şuhûdü’l-hâl: Fahrü’l-a‘yân Mirza Çavuş b. Mustafa, Fahrü’l-akrân Veli Bey b. Mustafa, Musli b. Musa, Mehmed Beşe b. Yusuf, Ali b. Abdi, Piyâle Çavuş b. ( ).