Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 144 Hüküm no: 127 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aişe Hatun bt. Derviş’in aldığı meblağı ödediğinden menzili üzerindeki Cafer Paşa Vakfı rehninin kaldırdığı Medîne-i hazret-i Ebâ Eyyûb el-Ensârî -radiye anhu Rabbuhü’l-bârî- de vâki‘ merhûm Cafer Paşa Vakfı’nın hâlâ mütevellîleri olan Mustafa Efendi b. Ali ve Mehmed Beşe b. ( ) nâm kimesneler meclis-i şer‘-i hatîr-i lâzımü’t-tevkīrde, medîne-i ( ) [mezkûre] mahallâtından Takyecibaşı mahallesi sâkinelerinden fahrü’l-muhadderât Aişe Hâtun bt. Derviş tarafından ikrâr-ı âti’l-beyânı tasdîka vekîl olup, mezbûreyi ma‘rifet-i şer‘iyye ile ârifân olan İbrahim Çelebi b. Ali ve Mustafa b. Rıdvan nâm kimesne şehâdetleri ile şer‘an vekâleti sâbite olan zevci Yahya Çavuş b. Hızır mahzarında her biri ikrâr-ı sahîh-i şer‘î ve i‘tirâf-ı sarîh-i mer‘î kılıp, müvekkile-i mezbûre zimmetinde mütevellîsi olduğumuz vakıf mâlından deyn-i şer‘îden otuz bin nakd-i râyic fi’l-vakt akçe alıp, meblağ-ı mezbûr mukābelesinde silk-i mülkünde münselik mahalle-i mezbûrede vâki‘ bir tarafı Çaşnigir Vakfı’ndan olan odalar ve bir tarafı Hayyât Ali b. ( ) mülkü ve bir tarafı mekābir-i müslimîn ve bir tarafı tarîk-i âm ile mahdûd olup büyût-ı müte‘addideyi müştemil olan mülk menzilini vakf-ı mezbûra rehin verip, biz dahi tevliyetimiz hasebiyle kabz eylemişdik. Hâlâ meblağ-ı mezbûru müvekkile-i merkūme cânib-i vakf-ı mezbûra bi’t-tamâm ve’l-kemâl edâ ve teslîm edip, biz dahi kabz ve tesellüm eylediğimizden sonra yedimizde meblağ-ı mezbûr mukābelesinde rehin olan menzil-i mezbûrun müvekkil-i merkūmeye def‘ ve teslîm edip, ol dahi kabz ve tesellüm edip fekk-i rehin olunup ve min ba‘d mâl-ı vakf-ı mezbûrdan müvekkile-i merkūme zimmetinde bir akçe ve bir habbe bâkī kalmadı dediklerinde, mukırrân-ı mezbûrânın minvâl-i meşrûh üzre cârî ve sâdır olan ikrârların vekîl-i mesfûr Yahya Çavuş vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fî selhi Saferi’l-hayr li sene selâsin ve erba‘în ve elf. Şuhûdü’l-hâl: Osman Çavuş b. Ahmed, Ahmed b. ( ), İbrahim Çavuş b. Ali, Rıdvan Bey b. ( ) el-Cündî, Muharrirü’l-hurûf Mehmed b. Mehmed el-kadı, Musli Bey b. Musa el-Cündî.