Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 144 Hüküm no: 128 Orijinal metin no: [24b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Efendi b. Mustafa’nın evini Kasım b. Ferhad’a sattığı Rumeli-i ma‘mûrede vâki‘ kasaba-i Karaferye mahallâtından Câmi‘-i atîk mahallesinde sâkin olan Mahmud Efendi b. Mustafa meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup, kasaba-i mezkûre mahallâtından İnebeykar mahallesinde kâin olan, tahtânî iki beyti, bahçeyi ve fırını müştemil bulunan, bir tarafdan Za‘îm Mehmed Bey mescidi, diğer tarafdan Ahmed Efendi b. ( ) mülkü, öteki tarafdan mekābir-i Müslimîn ve diğer tarafdan da tarîk-i âm ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve mürâfıkı ile râyicü’l-vakt yedi bin akçe semen-i mu‘ayyen-i makbûzla hâmil-i hâze’l-kitâb Kasım b. Ferhad’a îcâb kabûlü ve teslîm ve tesellümü hâvî bey‘-i bât-ı sahîh ile bey‘ etmiş olduğunu ikrâr ve i‘tirâf etti. Bâyi‘-i mezbûr bu def‘a semen-i merkūmdan dört bin akçeyi müşterî-i mezkûrdan ahz ü kabz ettiğini ikrâr ve i‘tirâf etti. Müşterî-i merkūmun zimmetinde zeyilde mezkûr ayın gurresinden altı aya müeccel üç bin akçe kaldı. Menzil-i mezbûr, bâyi‘-i mezkûrun yedinde, meblağ-ı bâkī mukābilinde rehn-i makbûzdur. Vâki‘ ikrâr mezbûr Kasım tarafından vicâhen ve şifâhen tasdîk edildi. Cerâ zâlike ve hurrire fî selh-i Saferi’l-hayr sene selâse ve erba‘în ve elf. Şuhûdü’l-hâl: Fahrü’l-kuzât Şeyh Mehmed Efendi b. ( ), Ahmed Efendi b. el-kadı eş-şehîr bi’l-mu‘îd, Mehmed Efendi b. eş-şehîr Bâlizâde, Mu‘îd Ali Efendi b. ( )