Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 145 Hüküm no: 129 Orijinal metin no: [24b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülâbiye bt. Abdullah’ın evini bey‘ bi’l-istiğlâl ile Ali Ağa Vakfı’na sattığı Dâru’l-hilâfeti’l-aliyye mahmiye-i Kostantıniyye mahallâtından Kızılminâre mahallesinde sâkine olan Gülâbiye bt. Abdullah nâm hâtun meclis-i şerî‘at-i şerîfe-i garrâ ve mahfil-i tarîkat-i münîfe-i zehrâda -sâneha’llâhu te‘âlâ ani’l-be’sâi ve’d-darrâi- hâzıra olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahmiye-i mahkiyye mahallâtından İbrahim Paşa mahallesinde vâki‘, bir tarafdan kısmen merhûm Takyeci Ferhad Vakfı ve kısmen merhûme Tâcî Hâtun mülkü, diğer tarafdan kısmen Ömer Beşe b. Abdullah mülkü ve kısmen Ali Beşe b. Abdullah mülkü, tarafeynden de tarîk-i âm ile mahdûd olan ve dokuz dükkânı müştemil bulunan cemî‘-i bahçesini cümle hudûdu ve kâffe-i hukūkuyla râyicü’l-vakt riyâl ta‘bîr edilen iki bin sikke-i harbiyye fıddiyye semen-i mu‘ayyen-i makbûzla merhûm Ali Ağa Vakfı mütevellîsi hâmil-i hâze’l-kitâb Ahmed Bey b. Osman’a îcâb kabûlü ve teslîm tesellümü hâvî bey‘ ile bey‘ ettiğini ikrâr ve i‘tirâf etti. Vâki‘ ikrâr, mütevellî-i mezbûr tarafından vicâhen ve şifâhen tasdîk edildi. Bâyi‘a-i mezkûrenin hadîka-i mesfûreyi icâreye almak istemesi üzerine müşterî-i mûmâ ileyh ba‘de’t-tahliye ve’t-tekābuz zeyilde mezkûr târihden bir sene tamâmına yirmi iki bin akçe ücret-i kirâ ile icâreye verdi. Sonra müste’cire-i mezkûrenin zevci Ahmed Bey b. Mustafa nâm kimesne derk-i hadîkaya ve dükkânlara îcâb ve kabûlü hâvî kefâletle kefil oldu. Cerâ zâlike ve hurrire fî selhi Saferi’l-hayr sene selâse ve erba‘în ve elf. Şuhûdü’l-hâl: Seyyid Mustafa b. Seyyid Mehmed, Seyyid Mehmed b. Seyyid Ahmed, Mustafa Beşe b. Ahmed, Yusuf Çelebi b. ( ), Muharrem Çelebi b. ( ), Piyâle Çavuş b. ( ), Muslu Çelebi b. ( )