Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 152 Hüküm no: 136 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed Beşe b. Abdullah’ın Yarhisârî Mustafa Efendi Vakfı’na ait icâreteynli vakıf menzilin tasarruf hakkını Mehmed Çavuş b. Hüseyin’e devrettiği Mahmiye-i Kostantıniyye’de Firuz Ağa mahallesi sükkânından el-Hâc Mehmed Beşe b. Abdullah er-Râcil meclis-i şer‘-i hatîr-i lâzımü’t-tevkīrde, dergâh-ı âlî yeniçerileri ocağı çavuşlarından Mehmed Çavuş b. Hüseyin nâm kimesne mahzarında bi tav‘ihî ikrâr ve takrîr-i kelâm edip, mahmiye-i merkūmede Yarhisârî Mustafa Efendi Vakfı’ndan mahalle-i merkūmede vâki‘ bir tarafı vakıf ve [bir] tarafı Ahmed Çavuş Vakfı ve bir tarafı tarîk-i hâs ve bir tarafı tarîk-i âm ile mahdûd olup, iki beyt-i süflîyi ve kenîf ve muhavvata-i yesîreyi müştemil olup icâre-i mu‘accele ve yevmî iki akçe icâre-i müeccele ile yedimde ve taht-ı tasarrufumda olan bir bâb menzilin hakk-ı tasarrufunu, vakf-ı merkūmun bi’l-fi‘il mütevellîsi olan Mustafa Çavuş ma‘rifetiyle mezbûr Mehmed Çavuş’a tefvîz ve teslîm eylediğimde, mezbûr Mehmed Çavuş dahi tefevvuz ve tesellüm eyledikden sonra mukābele-i tefvîzde yedinden yirmi bin nakd-i râyic fi’l-vakt akçesin alıp kabz eyledim. Min ba‘d menzil-i merkūmu mezbûr Mehmed Çavuş mutasarrıf olsun dedikde, mukırr-ı merkūm el-Hâc Mehmed Beşe’yi ikrâr-ı meşrûhunda mûmâ-ileyh Mehmed Çavuş dahi bi’l-muvâcehe tasdîk ve minvâl-i muharrer üzere tefevvuz ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fî gurreti Rebî‘ilevvel min şuhûri li sene selâsin ve erba‘în ve elf. Şuhûdü’l-hâl: Ahmed Efendi b. Ahmed el-İmâm, Mehmed b. el-Hâc Hüsam el-Müezzin, Mehmed Ağa b. Mirza, Eyüb Ağa b. Kara Ali Ağa, Osman Beşe b. Mustafa er-Râcil, Osman Efendi b. Mehmed el-Müderris, İbrahim b. Hüseyin, Mahmud b. Seydî.