Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 159 Hüküm no: 147 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arpacızâde Mehmed Efendi vârislerinin tereke davasında birbirlerinin zimmetini ibrâ ettiği Fi’l-asl vilâyet-i Anadolu’da medîne-i Kayseriye’de Bozanlar mahallesi ahâlîsinden olup bundan akdem Medîne-i Münevvere kazâsından münfasıl iken müteveffâ olan merhûm Arpacızâde Mehmed Efendi’nin sulbî oğlu olup mahmiye-i Kostantıniyye’de Derviş Ali mahallesinde müteveffâ olan Ahmed Çelebi nâm sagīrin verâseti vâlidesi Aişe bt. Abdullah nâm hâtun ile li-ebeveyn ammi Osman Efendi b. İbrahim nâm kimesneye münhasıra olmakla, muhallefâtının sülüsü vâlidesi merkūme Aişe Hâtun’a ve sülüsânı ammi-i merkūm Osman Efendi’ye isâbet eylediği zâhir ve müte‘ayyin oldukdan sonra merkūm Osman Efendi meclis-i şer‘de merkūme Aişe Hâtun mahzarında bi tav‘ihî ikrâr ve takrîr-i kelâm edip, müteveffâ-yı merkūm Ahmed Çelebi’nin muhallefâtından zikr olunan Derviş Ali mahallesinde vâki‘ olup, hudûd ve müştemilâtı beynimizde ve lede’l-cîrân ma‘lûm olan bir bâb menzil ile müddet-i merkūmede zikri sebk eden Bozanlar mahallesinde vâki‘ ma‘lûmü’l-hudûd bir bâb menzil ve Kulaklı nâm mevzi‘de vâki‘ ma‘lûmü’l-hudûd bir kıt‘a bağ ile Gurunlar? nâm mevzi‘de vâki‘ ma‘lûmü’l-hudûd bir kıt‘a [bağ] ve bir kıt‘a bağçenin vech-i meşrûh üzre sülüsü merkūme Aişe Hâtun’a ve sülüsânı bana isâbet edip ve muhallefât-ı merkūmeden hâric ez-defter altı yüz filori ile on sekiz bin kıymetli Musul esbâbı husûsunda beynimizde münâza‘ât-ı kesîre vâkı‘a olmuş iken muhallefât-ı merkūmeyi mezbûre Aişe Hâtun ile bi’t-terâzî iktisâm eylediğimizde, zikr olunan Derviş Ali mahallesinde vâki‘ olup sâlifü’z-zikr olan menzil merkūme Aişe Hâtun’un muhallefât-ı merkūmeden kendiye âyid olan sülüs hissesi mukābelesinde ta‘yîn olunup ve medîne-i merkūmede vâki‘ zikri sebk eden Bozanlar mahallesinde vâki‘ olup, benim makbûzum olan bir bâb menzil ile Kulaklıkaya ve Gurunlar nâm mevzi‘lerde vâki‘ iki kıt‘a bağ ve bir kıt‘a bahçe muhallefât-ı merkūmeden benim sülüsân hissem mukābelesinde ta‘yîn olunmakla, zikri sebk eden Derviş Ali mahallesinde vâki‘ olan menzil müstakillen merkūme hâtunun mülkü olup ve medîne-i merkūmede vâki‘ zikirleri sebk eden bir bâb menzil ve iki kıt‘a bağ ve bir kıt‘a bağçe dahi müstakillen benim mülküm olmak üzre tereke-i merkūmeyi vech-i meşrûh üzre iktisâm ve kabûl eylediğimizden sonra zikr olunan altı yüz filori ile on sekiz bin akçe kıymetli Musul esbâbına müte‘allik olan cemî‘-i da‘vâ ve talebden her birimiz âharın zimmetini bi’l-vekâle ibrâ-i âmm-ı kātı‘u’n-nizâ‘la ibrâ ve iskāt eyledik. Min ba‘d tereke-i merkūmeye müte‘allik da‘vâ ve nizâ‘ımız yokdur dedikde, mukırr-ı merkūm Osman Efendi’yi kelimât-ı meşrûhasında merkūme Aişe Hâtun dahi bi’l-muvâcehe tasdîk ve tereke-i mersûmeyi minvâl-i muharrer üzre iktisâm ve kabûl edip zikr olunan altı yüz filori murâdımız sekiz bin akçe kıymetli Musul esbâbına müte‘allik olan da‘vâdan kendi dahi merkūm Osman Efendi’nin zimmetini ibrâ ve iskāt eylediğin tahkīk edicek, mâ vaka‘a bi’t-taleb ketb olundu. Tahrîren fî evâili Rebî‘ilevvel li sene selâsin ve erba‘în ve elf. Şuhûdü’l-hâl: Receb Efendi b. Sadık el-Müderris, Mehmed Efendi b. Mehmed el-kadı, Ali b. Hüseyin, Yusuf Bey b. Abdullah, Abdullah Halîfe el-İmâm, Rıdvan Halîfe b. Abdullah el-Müezzin, Haydar Dede b. Abdullah, Himmet Beşe b. Mehmed en-neccâr, Piyâle Çavuş b. Abdullah, Fahrü’l-müderrisîn Abdülmecid b. Abdülbâkī Çavuş, Ali Çelebi el-Kâtib.