Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 163 Hüküm no: 155 Orijinal metin no: [29a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimoka’nın vârislerinin Mehmed Çelebi b. Pervane aleyhindeki bağ davasının reddi Kazâ-i havâss-ı aliyye muzâfâtından kasaba-i Çatalca’da Kefere mahallesinde sâkin iken mukaddemâ hâlik olan Dimoka v. ( ) nâm zimmînin verâseti, zevce-i metrûkesi Toybali bt. Pali ve sulbiye kebîre kızı Kaloğa’ya münhasıra olduğu şer‘an müte‘ayyin oldukdan sonra mezbûretân Toybali ve Kaloğa mahfil-i kazâda, âti’l-beyân olan bir kıt‘a bağa hâlâ mülkiyet üzre vâzı‘u’l-yed olduğu şer‘an sâbit olan râfi‘ü’l-kitâb Mehmed Çelebi b. Pervâne nâm kimesne mahzarında üzerine da‘vâ eyleyip, hâlâ mezkûr Mehmed Çelebi’nin yedinde ve tasarrufunda olup, kasaba-i mezbûre sınırında vâki‘ bir tarafı mîrî değirmen kurbunda bir tarafı Kulaksız bağı ve bir tarafı Anastaş v. Yani bağı ve bir tarafı Çukur çayır demekle ma‘rûf mevzi‘i ve bir tarafı tarîk-i âm ile mahdûd on dönüm mikdârı bir kıt‘a bağ mûrisimiz hâlik-i mezbûr Dimoka’nın terekesinden olup hasran vâriseleri olduğumuz cihetle ikimize intikāl edip mülk-i mevrûsumuz iken mezkûr Mehmed Çelebi bi gayri vech-i şer‘î vaz‘-ı yed etmişdir, suâl olunup bi hasebi’ş-şer‘i’ş-şerîf kasr-ı yedine tenbîh olunmak matlûbumuzdur dediklerinde, gıbbe’s-suâl mezkûr Mehmed Çelebi cevâbında, fi’l-vâki‘ tafsîl-i hâl zikr olunan minvâl üzre olup, lâkin hâlik-i mezbûr Dimoka zimmetinde cihet-i karzdan on iki bin fiddî râyic fi’l-vakt akçe hakkım olup, vâriseleri olan mezkûretân muvâcehelerinde vech-i şer‘î üzre isbât eyledikden sonra vârisetân-ı mezkûretân hudûd-ı mezkûre ile mahdûd olan bir kıt‘a bağı bana on üç bin mezkûru’n-na‘t akçeye bey‘-i bât-ı kat‘î ile bey‘ ve teslîm ve ba‘de’l-iştirâ zimmetimde semeni olan meblağ-ı mezbûr on üç bin akçenin on iki bin akçesine mevrûsları zimmetlerinde vech-i meşrûh üzre hakkım olan on iki bin akçeye mukāssa eyleyip, mâ‘adâsı olan bin akçesini yedinden bi’t-tamâm alıp kabz etmekle zikr olunan [bağ] mülk-i müşterâm olmuşdur deyü sâbıkan kasaba-i mezbûrede nâibü’ş-şer‘i’l-hatîr olan Osman Efendi b. Ahmed’in hat ve hâtemini müştemil mazmûnu kelâm-ı meşrûhuna muvâfık bin kırk iki Zilhiccesi evâhiri ile müverraha hüccet-i şer‘iyye ibrâz eyleyip, ba‘de’n-nazar ve’l-kırâe vârisetân-ı mezkûretân istintâk olundukda, mazmûn-ı hüccet-i mastûreyi bi tav‘ihâ i‘tirâf etmeğin, mûcebiyle mezkûretân Toybali ve Kaloğa da‘vâ-yı mezkûrdan men‘ olunup, mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene selâsin ve erba‘în ve elf. Şuhûdü’l-hâl: İskender Bey b. Şaban, Mehmed b. Ahmed, Ali b. Abdullah, Hüseyin b. Hasan.