Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 164 Hüküm no: 156 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hasan’ın menzil satışından hanımı Saliha bt. Mehmed’e borcu kalmadığı Mahmiye-i İstanbul’da Gül Câmi‘i kurbunda Mustafa Paşa mahallesinde sâkin olan Mehmed Bey b. Hasan nâm kimesne meclis-i şer‘de, zevcesi işbu hâfızatü’l-kitâb Saliha bt. Mehmed Çavuş nâm hâtun mahzarında bi tav‘ihî ikrâr ve takrîr-i kelâm edip, zevcem merkūme Saliha Hâtun bundan [akdem] mahalle-i merkūmede vâki‘ inde’l-cîrân ma‘lûmü’l-hudûd olan bir bâb mülk menzilini bana otuz bin akçeye bey‘-i kat‘î ile bey‘ ve teslîm eyledikde, ben dahi iştirâ ve kabûl edip semen-i merkūmun beş bin akçesini merkūmeye teslîm edip, yirmi beş bin akçesi zimmetimde iken menzil-i merkūm muhterik olup, meblağ-ı bâkī[yi] edâya hâzır akçem olmamakla, menzil-i merkūmun nısfını ve arsası hudûdu ile zevcem merkūme Saliha’ya deyn-i merkūm yirmi beş bin akçe mukābelesinde teslîm eylediğimde, merkūme dahi alıp kabz ve tesellüm edip meblağ-ı merkūm yirmi beş bin akçeden zimmetimi ibrâ ve iskāt eyledi dedikde, mukırr-ı merkūm Mehmed Bey’i kelimât-ı meşrûhasında merkūme Saliha Hâtun dahi bi’l-muvâcehe tasdîk ve minvâl-i muharrer üzre menzil-i merkūmun nısfını ve arsası[nı] deyn-i merkūm yirmi beş bin akçe mukābelesinde alıp kabz eylediğini tahkīk edicek, mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Rebî‘ilevvel li sene selâsin ve erba‘în ve elf. Şuhûdü’l-hâl: Mehmed Ağa b. ( ) el-ma‘rûf bi Defterdârzâde, Yusuf Bey b. Abdullah, Ramazan Bey b. Şaban, Mehmed Çelebi b. Hasan, Ali Bey b. Hüseyin.