Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 166 Hüküm no: 158 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Abdülmennân’ın Yasin Bey b. Mehmed’den aldığı meblağı ikrar ettiği Mukaddemâ Reisülküttâb iken müteveffâ olan merhûm Mustafa Efendi’nin kardeşi olup, medîne-i Âmid ahâlîsinden fahrü’l-akrân Yasin Bey b. Mehmed nâm kimesne meclis-i şer‘-i şerîf-i celîlü’ş-şân-ı cemîlü’l-ünvânda sâbıkan atebe-i aliyye-i sultâniyede muhâsebecilik hizmetinde olup mahmiye-i İstanbul mahallâtından Kalenderhâne mahallesinde sâkin umdetü’l-a‘yân İbrahim Efendi b. Abdülmennân nâm kimesne mahzarında takrîr-i kelâm ve bast ani’l-merâm eyleyip, mâbeynimizde ma‘lûm bir husûsun temşiyyeti için kendi mâl-ı hâlisimden müşârunileyh İbrahim Efendi’ye kâmil bin aded guruş-ı riyâlî def‘ ve teslîm edip, anlar dahi kabz ve tesellüm etmişlerdi, suâl ve takrîrleri tahrîr olunmak matlûbumdur dedikde, gıbbe’s-suâl mezkûr İbrahim Efendi cevâbında, fi’l-vâki‘ hâl minvâl-i meşrûh üzre olup mezkûr Yasin Bey mâl-ı hâlisinden beynimizde ma‘lûm bir husûsun temşiyyeti için bana kâmil bin aded riyâl guruş def‘ ve teslîm edip, ben dahi kabz ve tesellüm eyledim deyü bi’t-tav‘i’s-sâf ikrâr ve i‘tirâf eyledikde, sûret-i hâl bi’t-taleb ketb olundu. Tahrîren fî evâsıtı Rebî‘ilâhir li sene selâsin ve erba‘în ve elf. Şuhûdü’l-hâl: Umdetü’l-a‘yân Behrâm Kethüdâ, Umdetü’l-emâcid İbrahim Efendi rûznâmeci, es-Seyyid Osman b. es-Seyyid Ömer, es-Seyyid Ali b. es-Seyyid Veli, Yakub Bey b. Abdullah, Mustafa Bey b. Veli, Musa b. İslâm, Halil b. ( ), Ali Çelebi b. Hasan, Halil Subaşı b. Ali.