Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 167 Hüküm no: 160 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reisülküttâb Mustafa Efendi vârislerinin vasî İbrahim Efendi b. Abdülmennân’ın zimmetin ibrâ ettikleri Mukaddemâ Reisülküttâb olup mahmiye-i İstanbul’da Kalenderhâne mahallesinde müteveffâ olan merhûm Mustafa Efendi b. ( ) nâm kimesnenin verâseti, zevce-i metrûkeleri ( ) Belkıs bt. Abdullah nâm hâtunlara ve sulbiye kebîre kızı Rahime’ye ve sulbî sagīr oğulları Mehmed ve Abdullah’a münhasıra olduğu hâkim-i muvakki‘-i kitâb huzûrunda şer‘an müte‘ayyin oldukdan sonra sagīreyn-i mezkûreynin ammileri ve hâlâ tesviye-i umûrları için kıbel-i şer‘-i hatîrden mansûb vasîleri ve mezkûretân Belkıs Hâtun ve Rahime taraflarından husûs-ı âti’l-beyânda vekîlleri olup, hasm-ı şer‘î mahzarında vech-i mu‘teber-i mer‘î üzre vekâleti sâbite olan Yasin Bey b. Mehmed nâm kimesne meclis-i şer‘-i şerîfde, mahalle-i mezbûre sâkinlerinden mukaddemâ Başmuhâsebeci olup sagīreyn-i mezbûreynin tesviye-i umûrları için vasîyy-i şer‘îleri iken vesâyetden azl olunan râfi‘ü’l-kitâb umdetü’l-a‘yân İbrahim Efendi b. Abdülmennân nâm kimesne mahzarında bi’l-vesâye ikrâr ve takrîr-i kelâm edip, müşârunileyh İbrahim Efendi mukaddemâ sagīreyn-i mezbûreynin tesviye-i umûrları için kıbel-i şer‘den mansûb vasîleri olmakla, müteveffâ-yı mezbûrun muhallefâtından ber mûceb-i defter-i kassâm-ı askerî yirmi yük doksan beş bin sekiz yüz kırk dokuz akçeye vaz‘-ı yed eyleyip, meblağ-ı mezbûrdan üç yüz yirmi iki bin dokuz yüz on iki akçesin edâ-i düyûn-ı müsbete ve mehr-i müeccel ve resm-i kısmet ve sâyir mesârif-i lâzıme için harc ve sarf edip, mâ‘adâsı olan on yedi yük yetmiş iki bin dokuz yüz otuz yedi akçenin semeni iki yüz yirmi bin altı yüz otuz iki akçe zevce-i metrûkelerden mezbûretân ( ) ve Belkıs ve altışar yük yirmişer bin beşer yüz on altışar akçe ve oğulları sagīreyn-i mezbûreynin her birine üç yük on bin iki yüz seksen üç akçe kızı mezkûre Rahime’ye isâbet etmeğin, hâlâ vekâlet ve vesâyet-i mahkiyyem hasebiyle müvekkilemin ve sagīrân-ı mezbûrânın hisseleri için vech-i meşrûh üzre mezkûr İbrahim Efendi’nin mukaddemâ vesâyeten makbûzu olan cem‘an on altı yük altmış iki bin yüz yirmi bir akçeyi bi’t-tamâm ve’l-kemâl yedinden alıp kabz eyledim. Min ba‘d muhallefât-ı mezbûreye müte‘allik cemî‘-i de‘âvî ve talebden zimmeti berî olmuşdur dedikde, mukırr-ı mezbûr Yasin Bey’i ikrâr-ı meşrûhunda el-mukarru lehü’l-mesfûr İbrahim Efendi vicâhen tasdîk etmeğin, mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ilâhir li sene selâsin ve erba‘în ve elf. Şuhûdü’l-hâl: Es-Sâbikūn el-mezkûrûn.