Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 173 Hüküm no: 169 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan bt. Nasuh vakfı menzilin mütevellîliğine Mustafa Halife b. Kasım’ın tayin edildiği Dârü’s-saltanati’s-seniyye Kostantıniyye-i mahmiyye’de Soğukkuyu kurbunda Hacı Demirhânzâde mahallesinde merhûme Sultan bt. Nasuh Vakfı olan arsa üzerinde vâki‘ inde’l-cîrân ma‘lûmü’l-hudûd ve’l-hıytân olup, süknâsı mahalle-i merkūmede vâki‘ merhûm Pîr[î] Mahmud Paşa Câmi‘i imâmına meşrûta olan bir bâb vakıf menzilin hâlâ mütevellîsi olmayıp, cânib-i şer‘-i kavîmden bir mütevellî nasb olunmak lâzım ve mühim oldukda, câmi‘-i merkūmun bi’l-fi‘il imâmı olup menzil-i mersûme hasbemâ şarate’l-vâkıf mutasarrıf olan işbu hâfızu’l-kitâb Mustafa Halîfe b. Kasım nâm kimesne her vechile mahal ve müstahık olup, hizmet-i tevliyet uhdesinden gelmeğe kādir olmağın, mezbûr Mustafa Halîfe menzil-i merkūma savb-ı şer‘-i kavîmden hasbî mütevellî nasb ve ta‘yîn olundukda, mezbûr dahi tevliyet-i mersûmeyi kabûl ve hizmet-i lâzımesini edâya müte‘ahhid olıcak, mâ vaka‘a bi’t-taleb ketb ve tahrîr olundu. Tahrîren fî evâhiri Saferi’l-muzaffer li sene selâsin ve erba‘în ve elf. Şuhûdü’l-hâl: Ali Efendi b. Haydar, Mehmed Efendi b. Ahmed el-Müderris, Mehmed Efendi b. İsmail, el-Hâc Ali b. Ömer Mansûrî, el-Hâc Mahmud b. Mustafa, Piyâle Çavuş b. Abdullah.