Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 174 Hüküm no: 170 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayasofya-i Kebîr Vakfı mahzenlerin tasarruf haklarının devri Mahmiye-i İstanbul’da ( ) mahallesinde sâkine Fâtıma bt. Ali nâm hâtun tarafından husûs-ı âti’l-beyânda ikrâra vekîl olup, hasm-ı câhid-i şer‘î mahzarında el-Hâc Mustafa b. Abdullah ve Osman Bey b. el-Hâc Mehmed nâm kimesne[ler] şehâdetleri ile vekâleti sâbite olan Beyti Bey b. Hızır nâm kimesne meclis-i şer‘-i şerîfde, işbu kitâb-ı müstetâb eyâdî-i kerîmelerine vusûl ile şeref-yâb olan mahrûse-i Edirne kazâsından münfasıl umdetü’l-ulemâ’i’l-izâm kıdvetü’l-fuzalâ’i’l-kirâm menba‘u’l-mekârim ve’l-me‘âlî metbû‘ü’l-ekârim ve’l-e‘âlî Mahmud Efendi b. el-müvellâ el-merhûm el-mağfûrun-leh Mehmed Efendi mahzarlarında ikrâr ve takrîr-i kelâm eyleyip, müvekkilem mezbûre Fâtıma Hâtun Ayasofya-i Kebîr Vakfı’ndan olup mahmiye-i mezbûrede Mahmud Paşa hânında vâki‘ icâre-i mu‘accele ve her ayda elli akçe ücret-i müeccele ile mutasarrıfe olduğu ma‘lûmü’l-hudûd iki bâb mahzenin hakk-ı tasarruflarını, ma‘rifet-i mütevellî ile müşârunileyh Mahmud Efendi hazretlerine tefevvuz ve ferâğ ve ba‘de’t-tefvîz yedlerinden mukābelesinde altı yüz aded kâmil riyâlî guruş alıp kabz eyledi. Ba‘de’l-yevm zikr olunan iki bâb mahzenlerin tasarrufu mûmâ-ileyh hazretlerinin hakk-ı tasarruflarıdır emsâli gibi mutasarrıf olsunlar dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: El-Hâc Abbas b. İbrahim, İskender Bey b. Şaban, Mehmed Bey b. ( ), Ali Çelebi b. ( ) ve gayruhüm mine’l-huzzâr.