Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 182 Hüküm no: 181 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan bt. Nasuh vakfı menzil arsasının Karaçelebizâde Mahmud Efendi’ye kiraya verildiği Dârü’s-saltanati’s-seniyye mahmiyye-i Kostantıniyye’de Soğukkuyu kurbunda Hacı Demirhânzâde mahallesinde merhûme Sultan bt. Nasuh nâm sâhibetü’l-hayrın vakfı olan arsa üzerinde vâki‘ âti’z-zikr olan bir bâb vakıf menzilin meşrûtun-aleyh ve kıbel-i şer‘den mansûb mütevellîsi olup, mahalle-i merkūme kurbunda merkūm Pîrî Paşa Câmi‘i’nin bi’l-fi‘il imâmı olan Mustafa Halîfe b. Kasım nâm kimesne meclis-i şer‘-i hatîrde, bundan akdem mahmiye-i Edirne kazâsından münfasıl olup, bu kitâb-ı müstetâb yed-i kerîmelerine vusûl ile şeref-yâb olup beyne’l-mehâdimi’s-sa‘âde Kara Çelebizâde demekle ma‘rûf olan umdetü’l-ulemâ’i’l-kirâm kıdvetü’l-fuzalâi’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-a‘yân nâsıb-ı râyâti’l-irfân vâsıl-ı gāyâti’l-ma‘ârif sülâletü’l-efâzil ve’l-ekâbir vârisü’l-mecdi ve’ş-şeref kâbiren an kâbir el-müvellâ el-mahdûm Mahmud Efendi neclü’l-müvellâ el-merhûm Mehmed Efendi hazretleri mahzarlarında bi tav‘ihî ikrâr ve takrîr-i kelâm edip, vakf-ı merkūmdan mahalle-i mersûmede vâki‘ bir tarafı Ali Bey zevcesi demekle ma‘rûfe olan hâtun mülkü ve bir tarafı Mustafa Efendi nâm kadı yedinde olan menzil ve iki tarafı tarîk-i âm ile mahdûd olup elân imâmı olduğum sâlifü’z-zikr Pîrî Paşa Câmi‘i imâmlarına meşrûta olan bir bâb vakıf menzil, bundan akdem vâki‘ olan harîkde bi’l-külliye muhterik olup tecdîd ve imâretine vakfın müsâ‘adesi olmamakla, menzil-i merkūmun nakzı bey‘ ve arsasına mukāta‘a takdîr olunup semeni istirbâh ve istiğlâl olunmak fî külli’l-vücûh cânib-i vakfa nâfi‘ ve evlâ olmakla, menzil-i merkūmun nakzı mukaddemâ izn-i hâkimü’ş-şer‘le mecâlis-i tâlibînde nidâ ve müzâyede olundukda, müşârunileyh Mahmud Efendi hazretlerinin üzerlerinde dört akçede karâr edip bir akçe ziyâde ile âhar tâlibi olmamakla, tevliyet-i mahkiyyem hasebiyle menzil-i merkūmun nakzını semen-i merkūme mûmâ-ileyh Mahmud Efendi hazretlerine bey‘ ve kabz-ı semen eylediğimden sonra menzil-i merkūmun tûlen otuz beş ve arzan on bir bi hesâb-i şatrancî zirâ‘ binâ ile üç yüz seksen beş zirâ‘ olan arsasına ahâlî-i vukūf ittifâkıyla senede ecr-i misli olan yüz seksen akçe mukāta‘a takdîr olunup, tasarruflarına izin ve yedlerine hat ve hâtemi müştemil temessük verdim dedikde, mütevellî-i merkūmu kelimât-ı meşrûhasında müşârunileyh Mahmud hazretleri dahi bi’l-muvâcehe tasdîk ve minvâl-i muharrer üzre iştirâ ve kabûl eylediklerini tahkīk edicek, mâ vaka‘a bi’t-taleb ketb olundu. Tahrîren fî evâsıtı evâili’r-Rebî‘ayn li sene selâsin ve erba‘în ve elf. Şuhûdü’l-hâl: Bostan Efendi b. Mustafa el-kadı, Kıdvetü’l-müderrisîni’l-kirâm Mehmed Efendi b. el-merkūm Ali Efendi, Ali Çelebi b. Haydar, Ali Kethüdâ b. Abdullah, Hasan Bey b. Mustafa el-Cündî.