Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 186 Hüküm no: 186 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasin Bey b. Mehmed’in Mahmud Çelebi b. Mehmed’de alacağı kalmadığı Mahrûse-i Âmid ahâlîsinden Yasin Bey b. Mehmed nâm kimesne mahmiye-i İstanbul’da Kalenderhâne mahallesi sâkinlerinden Mahmud Çelebi b. el-merhûm Reisülküttâb Mehmed tarafından husûs-ı âti’l-beyânda husûmet ve redd-i cevâba ikāmet-i beyyine ve isbâta vekîl [ve] hasm-ı münkir-i şer‘î mahzarında nehc-i mu‘teber-i mer‘î üzre vekâleti sâbite olan fahrü’l-a‘yân İbrahim Efendi b. Abdülmennân nâm kimesne mahzarında üzerine da‘vâ eyleyip, müvekkil-i mezbûr Mahmud Çelebi zimmetinde cihet-i karz-ı şer‘îden iki yüz yirmi aded riyâlî guruş hakkım vardır, vekîl-i mezbûra suâl olunup ihkāk-ı hak olunmak matlûbumdur dedikde, gıbbe’s-suâl vekîl-i müşârunileyh İbrahim Efendi cevâba mütesaddî olup, fi’l-vâki‘ med‘uvv-i mesfûr Yasin Bey’in müvekkilim mesfûr Mahmud Çelebi zimmetinde cihet-i karzdan iki yüz yirmi aded riyâlî guruş hakkı var idi. Lâkin yine mahalle-i mezbûre sâkinlerinden sâbıkan reisülküttâb olup müteveffâ olan merhûm Mustafa Efendi b. ( ) meblağ-ı mezbûru mezkûr Mahmud Çelebi’den da‘vâ ve taleb ve kabz ve îsâle kardeşi mezkûr Yasin Bey tarafından vekâlet-i şer‘iyye isbât edip, edâsına hükm-i şer‘î sudûrundan sonra mezkûr Mustafa Efendi meblağ-ı mezbûru bi’t-tamâm alıp kabz eyledi deyip gıbbe’l-istintâk ve’l-inkâr vekîl-i müşârunileyh İbrahim Efendi’den sıdk-ı makāline beyyine taleb olundukda, mahalle-i mezbûre sâkinlerinden Halil b. Hızır ve Yusuf Bey b. Abdullah nâm kimesneler li ecli’ş-şehâde meclis-i şer‘e hâzırân olup gıbbe’l-istişhâdi’ş-şer‘î, fi’l-vâki‘ müteveffâ-yı mesfûr Mustafa Efendi kardeşi müdde‘î-i mezkûr Yasin Bey’in cihet-i karzdan müvekkil-i mesfûr Mahmud Çelebi zimmetinde hakkı olan meblağ-ı mezbûr iki yüz yirmi aded riyâlî guruş tarafından ahz u kabza ve kendiye îsâle isbât-ı vekâlet-i şer‘iyye eyleyip edâsına hükm-i şer‘î sudûrundan sonra merkūm Mustafa Efendi meblağ-ı mezbûru bi’t-tamâm mezbûr Mahmud Çelebi yedinden alıp kabz eyledi. Biz bu husûsa bu vech üzre şâhidleriz şehâdet dahi ederiz deyip edâ-i şehâdet-i şer‘iyye eylediklerinde, ba‘de’t-ta‘dîli’ş-şer‘î şehâdetleri makbûle olmağın mûcebi ile hükm olunup, mâ hüve’l-vâki‘ bi’t-taleb ketb olundu. Tahrîren fî evâili Rebî‘ilevvel li sene selâsin ve erba‘în ve elf. Şuhûdü’l-hâl: Mehmed b. Ahmed, Ali Bey b. Abdullah, Sinan b. Hızır, Yusuf b. Abdullah.