Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 187 Hüküm no: 187 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad v. Melkon’un borcunu ödemesine tenbih edildiği Mahmiye-i Kostantıniyye’de Langa kurbunda Kâtib Kasım mahallesinde sâkin olan hâmilü’l-kitâb Serkis v. Yakob nâm zimmî meclis-i şer‘-i hatîrde, mahalle-i merkūmede sâkin olan Murad v. Melkon nâm zimmî muvâcehesinde takrîr-i da‘vâ edip, bundan akdem merkūm Murad’ın zimmetinde cihet-i karzdan beş yüz riyâlî guruşum olmakla alıverilmek taleb ederim dedikde, gıbbe’s-suâl mezbûr Murad cevâbında, müdde‘î-i merkūm Serkis’in zimmetinde bi tarîki’l-mudârebeti’ş-şer‘iyye beş yüz esedî guruş ile bundan akdem emr-i sultânî ile te‘âtîsi memnû‘ olan züyûf akçeden kırk bin akçesi vardır deyü meblağ-ı merkūmun vech-i meşrûh üzre beş yüz esedî guruşdan mâ‘adâsı beş yüz riyâlî guruş olup ve cihet-i karzdan olduğunu bi’l-külliye münkir olıcak müdde‘î-i merkūm Serkis’den müdde‘âsına mutâbık beyyine taleb olundukda, ityân-ı beyyineden izhâr-ı acz edip merkūm Murad’a yemîn verilmek murâd edicek mezkûr Murad dahi meblağ-ı merkūmun minvâl-i muharrer üzre beş yüz esedî guruşdan mâ‘adâsı beş yüz riyâlî guruş olmayıp ve cihet-i karzdan olmadığına gıbbe’l-istihlâfi’ş-şer‘î yemîn billâhi’llezî enzele’l-İncîle alâ İsâ -aleyhi’s-selâm- edicek, i‘tirâfı mûcebince zimmetinde olup zikri sebk eden beş yüz esedî guruşun aynı ile sâlifü’z-zikr olan kırk bin züyûf akçenin altından kıymet-i şer‘iyyesini edâ ve îfâ için merkūm Murad’a tenbîh olunup, mâ vaka‘a bi’t-taleb ketb olundu. Tahrîren fî gurreti Şevvâli’l-mükerrem min şuhûri li sene selâsin ve erba‘în ve elf. Şuhûdü’l-hâl: Hüseyin Efendi b. Mustafa el-kadı, Haydar b. Abdullah, Yusuf Bey b. Abdullah, Piyâle Çavuş b. Abdullah, Mansur b. Muzaffer, Behrâm b. Abdullah, Hüseyin b. Ahmed.