Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 187 Hüküm no: 188 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin bağını İsa b. Mustafa’ya sattığı Mahmiye-i Kostantıniyye’de Saraçhâne kurbunda Mi‘mâr Ayas mahallesinde bundan akdem müteveffâ olan Osman b. Hasan nâm kimesnenin verâseti, sulbî oğlu Mehmed Beşe nâm kimesneye ve sulbiye kızı Râbia Hâtun’a münhasıra olmakla, terekesinin üç sehimde iki sehimi oğluna ve bir sehimi kızına intikāl eylediği zâhir ve müte‘ayyin oldukdan sonra müteveffâ-yı merkūmun sulbî oğlu merkūm Mehmed Beşe meclis-i şer‘de, işbu bâ‘isü’l-kitâb İsâ b. Mustafa nâm kimesne mahzarında bi tav‘ihî ikrâr ve takrîr-i kelâm edip, medîne-i Üsküdar tevâbi‘inden Çengel nâm karyede vâki‘ olup, bir tarafı fundalık ta‘bîr olunan arz-ı hâliye ve bir tarafı ba‘zan Andriye nâm zimmî mülkü ve ba‘zan Nikola Demi nâm zimmî bağı ve bir tarafı Panayot v. Andriye bağı ve bir tarafı tarîk-i âm ile mahdûd olan bağ ve yine zikr olunan bağ kurbunda vâki‘ olup, bir tarafı Dimitri v. Kosta nâm zimmî bağı ve bir tarafı Aleksandra nâm zimmî bağı ve bir tarafı Kuyumcu Yani nâm zimmî bağı ve bir tarafı ( ) nâm hâtun bağı ile mahdûd olan bağın nısfları merkūm İsa’nın ve nısfları babam müteveffâ-yı merkūm Osman’ın mülkü olup, ba‘dehû babam müteveffâ olmakla zikr olunan bağlardan olan nısıf hisseleri ’’li’z-zekeri misli hazzi’l-ünseyeyn’’ fehvâsınca üç sehimde iki sehimi bana ve bir sehimi kız karındaşım merkūme Râbia Hâtun’a intikāl etmiş idi. El-hâletü hâzihî zikr olunan iki kıt‘a bağda mülk-i mevrûsum olan ikişer hisse-i şâyi‘amı cümle tevâbi‘ ve levâhıkı ile safka-i vâhide ile merkūm İsa’ya on bin nakd-i râyic fi’l-vakt akçeye bey‘-i kat‘î ile bey‘ ve teslîm eylediğimde, mezbûr dahi vech-i meşrûh üzre iştirâ ve kabûl eyledikden sonra semen-i merkūmu bi’t-tamâm ve’l-kemâl yedinden alıp kabz ve tesellüm eyledim. Min ba‘d zikr olunan iki kıt‘a bağın nısıflarında vâki‘ olan üçer sehimde ikişer sehimi merkūm İsa’nın mülk-i müşterâsıdır dedikde, mukırr-ı merkūm Mehmed Beşe’yi ikrâr-ı meşrûhunda mezbûr İsâ dahi bi’l-muvâcehe tasdîk ve vech-i muharrer üzre iştirâ ve kabûlü tahkīk edicek, mâ vaka‘a bi’t-taleb ketb olundu. Tahrîren fi[’l-yevmi’s-] sânî min şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Mehmed Efendi b. Seydî el-İmâm, Mehmed b. Veli el-Müezzin, Süleyman b. Abdullah, Hüseyin Efendi b. Hüsam el-kadı, el-Hâc Abdülhalim b. Ali, Üstâd Mustafa b. Abdullah el-Hayyât, Veli b. Abdi el-fevâkihî, Satı b. Hacı el-fevâkihî, Mustafa b. Ahmed, Mustafa b. Mehmed.