Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 189 Hüküm no: 190 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Mihal’in bütününe sahip olduğunu zannettiği evin yarı hissesinin Yani’ye ait olduğunu anlayıp devretmesi. Mahmiye-i Kostantıniyye mahallâtından Tahtaminâre mahallesi sâkinlerinden olup mahdûd-ı âti’l-beyâna vâzı‘u’l-yed olan Dimo v. Mihal nâm zimmî meclis-i şer‘-i şerîfde, işbu râfi‘ü’l-kitâb Yani v. Doka nâm zimmî mahzarında bi’t-tav‘i’s-sâf ikrâr ve i‘tirâf edip, mahalle-i mezbûrede vâki‘ bir tarafı Ahmed Beşe b. Abdullah mülkü ve bir tarafından Sıvacı Kosta mülkü ve bir tarafı tarîk-i âm ve taraf-ı râbi‘i ( ) mülküne müntehî olmakla mahdûd olup, iki fevkānî ve bir tahtânî odayı ve iki sofayı müştemil olan menzilin mecmû‘u benim mülküm olmak zu‘mu ile ben mutasarrıf iken mezbûr Yani mahdûd-ı mezkûrun nısf-ı şâyi‘i kendinin mülkü olmak üzre benim üzerime da‘vâ edip, beynimizde husûs [-ı mezbûr] için münâza‘ât-ı kesîre vâkı‘a olmuş idi. Hâlâ fî hadd-i zâtihî mahdûd-ı merkūmun nısf-ı şâyi‘i mezkûr Yani’nin mülkü olduğu zâhir olup, benim dahi ilmim muhît olmağla mahdûd-ı mezkûrun nısf-ı şâyi‘inden kasr-ı yed eyledim, mezkûrun mülk-i mahzıdır, benim bi vech-i mine’l-vücûh alâkam yokdur, menzil-i mezbûrun nısfı[na] merkūm Yani keyfe mâ yeşâ ve yehtâr mutasarrıf olsun dedikde, gıbbe’t-tasdîki’ş-şer‘î mâ vaka‘a alâ vukū‘ihî bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: Hüseyin b. Hamza, Bostancı İbrahim Beşe b. Abdullah, Nikola v. Osta, Zeniko v. Nikola, Nikili v. Dimo, Papaz Kenel v. Rağraf.