Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 190 Hüküm no: 191 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo’nun damadı Yani’nin zimmetini ibrâ ettiği Mahmiye-i Kostantıniyye mahallâtından Tahtaminâre mahallesi sâkinlerinden iken bundan [akdem] mürd olan Lisa v. Dimo nâm nasrâniyenin verâseti babası mezbûr Dimo ve zevci Yani ve sadriye kızları Zikola ve Kakona’ya münhasıra olduğu müte‘ayyin oldukdan sonra mezbûr Dimo müşârunileyh Yani mahzarında bi’t-tav‘i’s-sâf ikrâr ve i‘tirâf edip, sulbiye kızım mürd-i mezbûrenin beynimizde ma‘lûm ba‘zı metrûkâtına merkūm Yani vaz‘-ı yed eylemek ile mezkûrun yedinde olan eşyâdan bana âide olan hisse-i mevrûsem için merkūm Yani ile hîn-i talebde beynimizde münâza‘ât-ı kesîre vâkı‘a oldukdan sonra beynimize muslihûn tavassut edip, dört bin nakd-i râyic fi’l-vakt akçe ve bir zenkârî zenne atlas kaftan ve iki köhne boğça üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel[-i] olan eşyâ-i merkūme ve meblağ-ı mezbûru bi’t-tamâm ahz ve kabz edip, mürd-i mezkûrenin muhallefâtından mezkûr Yani’nin yedinde olan eşyâ-i ma‘lûme-i mezkûreden bana âid olan hisse-i mevrûse da‘vâsından mezkûr Yani’nin zimmetini ibrâ-i âmm-ı kātı‘u’n-nizâ‘ ile ibrâ eyledim. Min ba‘d da‘vâ-yı mezkûreden merkūm Yani’nin zimmeti berîedir dedikde, gıbbe’t-tasdîki’ş-şer‘î mâ vaka‘a alâ vukū‘ihî bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: Papa Hamostodor v. Kiga, Papa Kenel v. Rağraf, Nikola v. Osta.