Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 190 Hüküm no: 192 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aişe Hatun bt. Ali’nin evini Halil Çelebi b. Mehmed’e sattığı Mahmiye-i Kostantıniyye’de Cebeali kapısı kurbunda Molla Hüsrev mahallesinde bundan akdem müteveffâ olan Ali b. Abdullah nâm kimesnenin sulbiye kızı ve bi tarîk[i’ş-şer‘î] vârisesi olan Aişe nâm hâtun meclis-i şer‘-i hatîr-i lâzımü’t-tevkīrde, kız karındaşı oğlu olup dergâh-ı âlî -dâme mahfûfen bi’l-me‘âlî- yeniçerilerinden Korucu tâifesinden işbu hâfızu’l-kitâb fahrü’l-emâsil ve’l-eşbâh Halil Çelebi b. Mehmed nâm kimesne mahzarında bi tav‘ihâ ikrâr ve takrîr-i kelâm edip, mahalle-i merkūmede vâki‘ fevkānî bir odayı ve zulleyi ve kenîfi müştemil olup iki tarafı merkūm Halil çelebi mülkü ve bir tarafı Vekîl-i harc Mustafa mülkü ve bir tarafı tarîk-i âm ile mahdûd olup, babam müteveffâ-yı merkūmdan bi tarîki’l-irsi’ş-şer‘î intikāl eden bir bâb mülk-i muhterik selâmlık yerini cümle hudûdu ve kâffe-i hukūku ile mezbûr Halil Çelebi’ye altı bin nakd-i râyic fi’l-vakt fıddî akçeye bey‘-i kat‘î ile bey‘ ve teslîm eyledikde, merkūm dahi vech-i mersûm üzre iştirâ ve kabûl eyledikden sonra semen-i merkūmu bi’t-tamâm ve’l-kemâl yedinden alıp kabz ve tesellüm eyledim. Min ba‘d mülk-i müşterâsıdır dedikde, mukırra-i merkūme Aişe Hâtun’u kelimât-ı meşrûhasında merkūm Halil Çelebi dahi bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: El-Hâc Abbas b. İbrahim, Ramazan Beşe b. Abdullah, Hasan Beşe b. Yahya er-Râcil, Mehmed Ağa kethüdâ-yı yesâriyân-ı hâssa, el-Hâc Mehmed b. ( ) el-Yesârî mine’l-fi’eti’l-ma‘rûfe bi altmış üçüncü, Ali b. Mehmed el-ma‘rûf bi Pazarbaşıoğlu, Piyâle Çavuş b. Abdullah.