Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 191 Hüküm no: 193 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Efendi b. Abdi’nin terekesinin taksim edildiği Mahmiye-i Kostantıniyye’de Bucakyalı mahallesinde bundan akdem müteveffâ olan Rıdvan Efendi b. Abdi nâm kimesnenin verâseti zevce-i metrûkesi Rahime bt. Ömer nâm hâtun ile sulbiye kızları Emine ve Aişe nâm hâtunlara münhasıra olup, ba‘de’l-iktisâm merkūme Aişe Hâtun dahi müteveffât olup verâseti vâlidesi merkūme Rahime Hâtun ile li-ebeveyn kız karındaşı merkūme Emine Hâtun’a münhasıra olmakla terekesinin bi tarîki’r-red mes’elesi olan beş sehimin iki sehimi vâlidesine ve üç sehimi kız karındaşına isâbet eylediği zâhir ve müte‘ayyin oldukdan sonra merkūmetân Rahime Hâtun ve Emine Hâtun meclis-i şer‘e gelip her biri takrîr-i kelâm edip, müteveffâ-yı sâlifü’z-zikr Rıdvan Efendi’nin mahlûlünden mahalle-i merkūmede vâki‘ büyût-ı müte‘addideyi müştemil olup, bir tarafı Asiye Hâtun ve Mustafa Çelebi mülkleri ve bir tarafı Fâtıma Hâtun Vakfı ve bir tarafı diğer Fâtıma mülkü ve Mühreci Sinan ve Emine Hâtun vakıfları ve bir tarafı tarîk-i hâs ile mahdûd olup, bi tarîki’ş-şer‘î ikimize ve kızı müteveffât-ı merkūme Aişe Hâtun’a intikāl etmekle mukaddemâ savb-ı şer‘den nâib ve mi‘mâr irsâl olunup, ahâlî-i vukūf ittifâkı ile ba‘de’l-mesâha on dokuz bin sekiz yüz beş akçeye takvîm olunup ebniye ve arsasından her birimizin hesâb-ı mezkûr üzre hissesi ta‘yîn ve teslîm olundukda, merkūme Aişe Hâtun’a tarîk-i hâs tarafında vâki‘ olup sekiz bin altı yüz altmış altı akçe kıymetli iki bâb tahtânî oda ile tûlen ve arzan bi hesâbı şatrancî yüz altmış altı zirâ‘ arsa ta‘yîn ve hissesi mukābelesinde kendiye teslîm olunup hüccet-i şer‘iyye tahrîr olunmuşdu. Hâlâ zikr olunan iki bâb oda ve yüz altmış zirâ‘ arsa bi tarîki’l-irsi’ş-şer‘î ikimize intikāl etmekle beynimizde bi’t-terâzî taksîm etmek için her birimizin hissesi ta‘yîn olunup hüccet olunmak taleb ederiz dediklerinde, zikr olunan sekiz bin altı yüz altmış akçe kıymetli ebniye ve yüz altmış altı zirâ‘ arsadan bâ‘isetü’l-kitâb merkūme Rahime Hâtun’a tashîh-i merkūm vefkince beş sehimden iki sehim hissesi mukābelesinde üç bin dört yüz altmış altı buçuk akçe kıymetli ebniye ile altmış altı buçuk zirâ‘ arsa isâbet edip ve merkūme Aişe Hâtun’a dahi kezâlik beş sehimden üç sehim hisse mukābelesinde beş bin yüz doksan dokuz buçuk akçe kıymetli ebniye ile doksan buçuk zirâ‘ arsa isâbet eylediği merkūmetânın talebleri ile ketb ve sûreti yedlerine def‘ olundu. Tahrîren fi’l-yevmi’s-sâbi‘ ve’l-ışrîn fî şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Hüseyin Hoca b. Veli el-İmâm, Mehmed Halîfe b. Mustafa el-Müezzin, Mehmed Efendi b. Mustafa el-İmâm, Mehmed Bey b. Bostân el-Yesârî, Yusuf b. Şaban, Siyavuş Bey b. Abdullah el-Cündî, Mansur b. Hamza.